नारायणी र दरमखोलामा जलसतहले सतर्कता तह पार गरेको छ। बाढी पूर्वानुमान महाशाखाले शनिबार बिहान ६:५० बजे सूचना जारी गर्यो। चितवनको देवघाटस्थित नारायणी नदी र बागलुङको वामीटक्सारस्थित दरमखोला जलमापन केन्द्रमा नदीको सतह लगातार बढ्दो छ।
जलसतह बढ्दै गएकाले नदीको तल्लो तटीय क्षेत्रका बासिन्दालाई महाशाखाले साँझसम्मै उच्च सतर्कता अपनाउन आग्रह गर्यो। नदीमा पानीको बहाव थप बढ्न सक्ने सम्भावना छ।
यसैबीच, मौसम पूर्वानुमान महाशाखाले पछिल्लो १२ घण्टामा गुल्मीको भार्सेमा ११४ मिलिमिटर वर्षा मापन गर्यो। गण्डकी, लुम्बिनी, कर्णाली र सुदूरपश्चिम प्रदेशका केही स्थानमा भारी वर्षा भएको छ। कोशी, मधेश र बागमती प्रदेशमा हल्कादेखि मध्यम वर्षा भयो।
