मंगलबार बिहान ८ बजेसम्मको तथ्यांकअनुसार देशका विभिन्न राजमार्ग तथा सडक खण्डहरू बाढी, पहिरो र मर्मत कार्यका कारण अवरुद्ध भएका छन्। कोशी, बागमती, लुम्बिनी र कर्णाली प्रदेशका मुख्य सडकहरू प्रभावित हुँदा यातायात सञ्चालनमा समस्या आएको छ।
कोशी प्रदेशअन्तर्गत भोजपुर नगरपालिका-५, बोखिममा मध्यपहाडी लोकमार्ग गत वैशाख १२ गतेदेखि बाढीले प्रभावित छ। हाल यो सडक खण्ड एकतर्फी सुचारु छ। वैकल्पिक बाटो समेत उपलब्ध छ।
बागमती प्रदेशको काभ्रेपलाञ्चोकमा बीपी राजमार्ग सडक खण्डमा सवारी साधन सञ्चालनमा रोक लगाइएको छ। खुर्कोट-नेपालथोक-कटुञ्जेबेंसी चल्ने सवारी साधनहरू गत जेठ २२ गतेदेखि रोकिएका हुन्।
मकवानपुरको इन्द्रसरोवर गाउँपालिका २ र ४ महालक्ष्मीस्थित कुलेखानी-फाखेल-हुमाने-फर्पिङ-काठमाडौँ सडक मर्मतका कारण पूर्ण रूपमा अवरुद्ध छ। जेठ १५ गतेदेखि बन्द यो बाटो २५ गतेसम्म बन्द रहनेछ।
लुम्बिनी प्रदेशको रोल्पा माडी गाउँपालिका ६ हार्निडाँडामा असार २२ गतेको पहिरोले रुकुम-घोराही-सहिद मार्ग पूर्ण रूपमा अवरुद्ध पारेको छ।
कर्णाली प्रदेशअन्तर्गत रुकुम पश्चिम आठबीसकोट नगरपालिका-६, रिजेगार्ड खोलाको बाढीले असार १७ गतेदेखि भेरी करिडोर बन्द छ। जाजरकोट नलगाड नगरपालिका-८ मालुवामा गत जेठ २३ गतेको पहिरोले जाजरकोट-डोल्पा सडक खण्ड अवरुद्ध पारेको छ।
