पश्चिम नवलपरासीको प्रतापपुर गाउँपालिका-९ बेलाटारीबाट स्रोत नखुलेको २१ लाख ६० हजार रुपैयाँ नगदसहित दुई जना पक्राउ परेका छन्। भारतबाट नेपालतर्फ आउँदै गरेको यूपी ५६ बीएच ६५५६ नम्बरको मोटरसाइकल जाँच गर्दा प्रहरीले उक्त रकम बरामद गरेको हो।
प्रक्राउ पर्नेमा प्रतापपुर गाउँपालिका-६ गुठीप्रसौनीका २५ वर्षीय अंकित गुप्ता र सोही ठाउँका २० वर्षीय अभिनन्दन गुप्ता छन्। लुम्बिनी प्रदेश प्रहरी कार्यालय, दाङ तथा जिल्ला प्रहरी कार्यालय पश्चिम नवलपरासीको टोलीले उनीहरूलाई नियन्त्रणमा लिएको हो।
इलाका प्रहरी कार्यालय बेलाटारीमा राखी उनीहरूमाथि थप अनुसन्धान भइरहेको छ। बरामद रकमको स्रोत र घटनाको वास्तविकताबारे प्रहरीले अनुसन्धान अघि बढाएको छ।
