नेपालमा अब २०० र ५०० दरका भारतीय रुपैयाँ (भारु) का नोट चल्ने भएका छन्। नेपाल राष्ट्र बैंकले सन् २०१६ नोभेम्बर ९ देखि निष्कासन भएका भारु २०० र ५०० दरका नोटलाई नेपालमा चलाउने व्यवस्था मिलाएको हो।
नयाँ व्यवस्था अनुसार, नेपाली वा भारतीय नागरिकले प्रति व्यक्ति २५ हजार भारुसम्मको सीमामा यी दरका नोटहरू ल्याउन, लैजान वा सटही गर्न सक्नेछन्। यसअघि १०० भारुसम्मका नोट मात्रै चलाउने अनुमति थियो।
राष्ट्र बैंकले जारी गरेको सूचनामा भनिएको छ, ‘सन् २०१६ नोभेम्बर ९ देखि निष्कासन भई चलनचल्तीमा रहेका भारु २०० र ५०० दरका नोट नेपाली वा भारतीय नागरिकले प्रति व्यक्ति २५ हजार भारुको सीमासम्म प्रचलित व्यवस्था बमोजिम ल्याउन, लैजान तथा सटही गर्न सकिने व्यवस्था गरिएको छ।’
यो निर्णयले सीमावर्ती क्षेत्रमा बसोबास गर्ने र व्यापार गर्नेहरूका लागि सहजता ल्याउने अपेक्षा छ। यसअघि ठूलो दरका भारु नोटमा प्रतिबन्ध हुँदा सटहीको समस्या हुने गरेको थियो।
