इटहरीस्थित नेपाल विद्युत प्राधिकरणका इन्जिनियर कृष्ण नारायण यादव ५० हजार रुपैयाँ घुससहित अख्तियार दुरुपयोग अनुसन्धान आयोगको नियन्त्रणमा परेका छन्।
इटहरी वितरण केन्द्रमा कार्यरत सातौँ तहका इन्जिनियर यादवले एक गार्मेन्ट उद्योगमा २० केभी क्षमताको विद्युत लाइन जडानका लागि सहजीकरण गरिदिएबापत सेवाग्राहीसँग घुस मागेको उजुरी आयोगमा परेको थियो।
सोही सूचनाका आधारमा अख्तियारको इटहरी कार्यालयबाट खटिएको टोलीले उनलाई इटहरी उपमहानगरपालिका वडा नम्बर ९ बाट बिहीबार नियन्त्रणमा लिएको हो।
पक्राउ पर्दा यादवको साथबाट घुसबापतको ५० हजार रुपैयाँ र स्रोत नखुलेको थप १२ हजार ८५ रुपैयाँ समेत बरामद भएको अख्तियारले जनाएको छ।
उनलाई भदौ १७ गते नियन्त्रणमा लिएर थप अनुसन्धान सुरु गरिएको थियो। अख्तियारका प्रवक्ता सुरेश न्यौपानेका अनुसार पक्राउ परेका यादवमाथि घुस/रिसवत भ्रष्टाचार सम्बन्धी मुद्दामा अनुसन्धान गर्न विशेष अदालतबाट म्याद थप गरिएको छ।
यादवमाथि अहिले हिरासतमा राखेर विस्तृत अनुसन्धान प्रक्रिया अगाडि बढाइएको छ।
