एनएमबि बैंकको इन्डो-नेपाल पी२पी रेमिटेन्स: खाता नम्बरको सट्टा भीपीए
काठमाडौं। एनएमबि बैंकले नेपाल-भारत क्रसबोर्डर पर्सन-टु-पर्सन (पी२पी) रेमिटेन्स सेवा सुरु गरेको छ। बैंकले नेपाल क्लियरिङ हाउस लिमिटेड (एनसीएचएल) को सहकार्यमा यो सेवा प्रारम्भ गरेको हो।
यो नयाँ सेवाले भारतबाट नेपाल र नेपालबाट भारतमा पैसा पठाउन तथा प्राप्त गर्नलाई थप सुरक्षित र सहज बनाउने बैंकले जनाएको छ। अब भारतबाट पैसा पठाउँदा धेरै दिन कुर्नुपर्ने झन्झट अन्त्य हुनेछ।
एनएमबि बैंकका अनुसार, भारतबाट रकम पठाउनेबित्तिकै एनएमबि बैंकमा रहेको व्यक्तिगत खातामा तुरुन्तै पैसा जम्मा हुनेछ। यसअघि पैसा मगाउन वा पठाउनका लागि खाता नम्बर अरूलाई सेयर गर्नुपर्ने बाध्यता थियो।
एनएमबि बैंकका प्रमुख कार्यकारी अधिकृत (सीईओ) सुनिल केसीले यस सेवाले इन्डो-नेपाल रेमिटेन्सलाई अझ सुलभ र सुरक्षित बनाएको बताएका छन्। उनले भने, “हामीले ग्राहकको सुविधालाई मध्यनजर राखेर यो प्रविधिमा आधारित सेवा ल्याएका छौं, जसले गर्दा अब खाता नम्बरको सट्टा भीपीए (Virtual Payment Address) प्रयोग गरेर पनि रकम पठाउन र प्राप्त गर्न सकिनेछ।”
यो सेवा अन्तर्गत, भारतबाट रकम पठाउँदा अब ग्राहकले आफ्नो बैंक खाता नम्बर दिनुको सट्टा भीपीए मात्रै प्रयोग गर्न सक्नेछन्। यसले गर्दा व्यक्तिगत खाता नम्बर गोप्य रहने र सुरक्षा थप मजबुत हुनेछ। एनएमबि बैंकले यो सेवा आगामी दिनमा थप विस्तार गर्ने योजना रहेको जनाएको छ।
