अर्थमन्त्री स्वर्णिम वाग्लेले संसद्ले कार्यपालिकालाई म्यान्डेट दिने भएकाले आवश्यक परे सरकार गठनदेखि विघटनसम्मको अधिकार प्रतिनिधिसभासँग रहने बताएका छन्।
राप्रपा सांसद खुश्बु ओलीले उठाएको प्रश्नको जवाफमा वाग्लेले वेस्टमिन्स्टर संसदीय प्रणालीबारे स्पष्ट पारे।
उनले भने, “वेस्टमिन्स्टर प्रणालीमा संसद् सार्वभौम हुन्छ। मन नपरेको खण्डमा सरकार ढाल्न सकिन्छ। तर बहुमतीय प्रणालीमा अंकगणित र स्थापित मान्यताहरू पनि महत्त्वपूर्ण हुन्छन्।”
वाग्लेले दैनिक प्रशासनिक निर्णय संसद्मा सम्भव नहुने भएकाले केही अधिकार कार्यपालिकालाई प्रत्यायोजन गरिएको बताए।
उनले कार्यपालिकाका निर्णय र सम्झौता अन्ततः संसद्ले अनुमोदन वा अस्वीकृत गर्ने व्यवस्था धेरै लोकतान्त्रिक मुलुकमा रहेको उल्लेख गरे।
संसद् नै कानुन निर्माण गर्ने सर्वोच्च संस्था हो। आवश्यक परे विद्यमान व्यवस्था परिवर्तन गर्ने अधिकार पनि प्रतिनिधिसभासँग सुरक्षित छ।
