भन्सार कर छली प्रकरणमा अर्थमन्त्रीले संसदीय समितिको छलफलमा झुट बोलेको राप्रपा सांसद ज्ञानबहादुर शाहीले आरोप लगाएका छन्। बिहीबार प्रतिनिधिसभा बैठकमा बोल्दै उनले करका दर हेरफेर र भन्सार राजस्वको अनियमिततामा निष्पक्ष छानबिनका लागि संसदीय समिति गठनको माग गरे।
शाहीले संसदीय छानबिनको माग अर्थमन्त्रीलाई काम रोक्न नभई सत्यतथ्य बाहिर ल्याउन भएको स्पष्ट पारे। उनले विगतमा सुशासनका प्रतिबद्धता कार्यान्वयन नभएको जिकिर गरे।
उनले अघिल्लो सरकारले तातोपानी, रसुवागढी र कोरला नाकाबाट मात्रै २ अर्ब ५० करोड ८३ लाख रुपैयाँभन्दा बढी राजस्व छुट दिएको विषयमा छानबिनको माग गरे। महालेखा परीक्षकको प्रतिवेदनले देशभर करिब ३ अर्ब ७७ करोड ४४ लाख रुपैयाँ कर असुलउपर गर्नुपर्ने औंल्याएको छ।
“तातोपानी, रसुवागढी र कोरला नाकाबाट मात्रै २ अर्ब ५० करोड ८३ लाख १६ अघिल्लो सरकारले दियो। त्यसको छानविन गर भनेको छ। देशभर ३ अर्ब ७७ करोड ४४ लाख १९ हजार रुपैयाँ करको दरमा छानबिन गरी असुलउपर गर्नुपर्छ भनेर महालेखा परीक्षकले रिपोर्ट दिएको छ,” उनले भने।
शाहीले १ देखि १४ गतेसम्म करिब ३ हजार सवारी साधन नेपाल भित्रिँदा २१ गते गाडी आइपुगेको र भन्सार १४ गते पास भएको सन्दर्भमा करका दर थाहा नभई कसरी प्रक्रिया अघि बढ्यो भनी प्रश्न गरे।
उनले करका दरसम्बन्धी संसदीय छानबिन समिति गठनमा किन आपत्ति छ भनी प्रश्न गरे। कसैलाई दोषी करार नगरी सत्यतथ्य सार्वजनिक हुनुपर्ने उनको माग छ। स्रोतका अनुसार सांसद शाहीले अर्थमन्त्री वाग्लेले संसदीय समितिमा झुट बोलेको आरोप लगाएका छन्।
