संसदीय सुनुवाइबाट अनुमोदन भएका डा. मनोजकुमार शर्माले आजै प्रधानन्यायाधीशको पद तथा गोपनीयताको शपथ लिने भएका छन्।
राष्ट्रपति कार्यालय शीतलनिवासमा साँझ ६ बजेर १० मिनेटमा शपथ ग्रहणको तयारी गरिएको छ। सर्वोच्च अदालतका प्रवक्ता अर्जुन कोइरालाका अनुसार शपथपछि शर्माले साँझ ७ बजेसम्ममा पदभार ग्रहण गरिसक्ने कार्यक्रम छ।
त्यसअघि राष्ट्रपति रामचन्द्र पौडेलले उनलाई प्रधानन्यायाधीशमा नियुक्त गर्नेछन्। मंगलबार बसेको संसदीय सुनुवाइ समितिको बैठकले शर्माको नाम प्रधानन्यायाधीशमा सर्वसम्मत अनुमोदन गर्ने निर्णय गरेको थियो।
समितिले प्रस्तावित प्रधानन्यायाधीश शर्माको सुनुवाइ गरेको थियो, जहाँ उनले आफ्नो कार्ययोजना प्रस्तुत गरेका थिए। समितिले उजुरीकर्ताहरूसँग पनि मंगलबार नै छलफल गरेको थियो।
समितिको अनुमोदन निर्णयबारे राष्ट्रपतिलाई लिखित जानकारी गराइएको छ। सोही आधारमा राष्ट्रपतिले शर्मालाई नियुक्त गरी शपथ गराउनेछन्।
