प्रधानमन्त्री बालेन शाहले सामाजिक सञ्जालमार्फत परम्परागत राजनीतिक दलका शीर्ष नेताहरूको कार्यशैलीमाथि कडा व्यंग्य प्रहार गरेका छन्। उनले दलका नेताहरूले कार्यकर्तालाई सडकमा भिड्न उक्साउने तर नेतृत्व तह सधैँ सुरक्षित र सत्ताको स्वादमा रमाउने प्रवृत्तिलाई उजागर गरेका छन्।
शाहको यो टिप्पणीले राजनीतिक वृत्तमा नयाँ तरंग ल्याएको छ। यसले राजनीतिक आन्दोलनमा कार्यकर्ताको प्रयोग र नेताहरूको व्यक्तिगत फाइदाबीचको भिन्नतालाई स्पष्ट पार्दै आम जनगुनासोलाई मुखरित गरेको छ।
कार्यकर्ताको प्रयोग र नेतृत्वको स्वार्थ
राजनीतिक आन्दोलन र स्वार्थको लडाइँमा सर्वसाधारण कार्यकर्ता प्रयोग हुने यथार्थलाई औंल्याउँदै प्रधानमन्त्री शाहले ‘तपाईंहरुको कार्यकर्ता लड्छन्, नेता हाँसेर बस्छन’ भनी लेखेका छन्। यसले नेपालको वर्तमान राजनीतिक परिदृश्यलाई झल्काउँछ, जहाँ दलका झन्डा बोक्ने कार्यकर्ताहरू सडकमा उत्रिन्छन् र घाइते हुन्छन् तर सत्ताको भागबन्डा मिल्नासाथ तिनै नेताहरू मञ्चमा सँगै हाँसेर बस्छन्।
यसको विपरीत, बालेन शाहले आफू र आफ्नो अभियानलाई ‘मानवता’ सँग जोडेका छन्। उनले ‘हाम्रो नेता लड्छन, मानवताले आश गर्छन’ भन्दै स्वतन्त्र वा नयाँ राजनीतिक धारका नेताहरू सस्तो राजनीतिक दाउपेचका लागि नभई जनता र मानवताको हितका लागि अग्रपङ्क्तिमा रहेर लड्ने दाबी गरेका छन्।
देश र पार्टी जोगाउने फरक दृष्टिकोण
प्रधानमन्त्री शाहको स्ट्याटसको सबैभन्दा बलियो पक्ष भनेको परम्परागत दल र नयाँ राजनीतिक सोचबीचको वैचारिक भिन्नतालाई प्रष्ट पार्नु हो। उनले आफ्नो भनाइको अन्त्य गर्दै ‘फरक यती हो! देश जोगाउने र पार्टी जोगाउनेमा फरक हुन्छ!’ भनी उल्लेख गरेका छन्।
पछिल्लो समय सत्ता गठबन्धन, सरकार परिवर्तन र पार्टीभित्रको गुटबन्दीमा मात्र रुमल्लिएका पुराना दलहरूलाई यो सीधा प्रहार हो। दलहरू आफ्नो पार्टीको अस्तित्व, सरकार र पद जोगाउन मात्र केन्द्रित भइरहँदा देशका मूल मुद्दा ओझेलमा परेको आम जनगुनासोलाई प्रधानमन्त्री शाहले आफ्नै शैलीमा व्यक्त गरेका हुन्।
