प्रधानमन्त्री बालेन शाहले बिहीबार सुरक्षा निकायका प्रमुखहरूसँग उच्चस्तरीय ब्रिफिङ लिँदै अपराध नियन्त्रणमा ‘शून्य सहनशीलता’ को नीति अपनाउन कडा निर्देशन दिएका छन्। चाडपर्वको समयमा नागरिकको सुरक्षा व्यवस्थापन र समग्र देशको शान्ति-सुरक्षा अवस्थाबारे जानकारी लिएपछि उनले यस्तो निर्देशन दिएका हुन्।
सिंहदरबारस्थित प्रधानमन्त्री तथा मन्त्रिपरिषद्को कार्यालयमा भएको छलफलमा प्रधानमन्त्री शाहले सुरक्षा व्यवस्थालाई थप चुस्त-दुरुस्त बनाउन आवश्यक रणनीतिबारे छलफल गरेका थिए। नागरिकको जीउधनको सुरक्षामा कुनै पनि प्रकारको कमजोरी सरकारलाई स्वीकार्य नहुने उनको स्पष्ट सन्देश थियो।
ब्रिफिङमा नेपाली सेनाका प्रधान सेनापति अशोकराज सिग्देल, नेपाल प्रहरीका महानिरीक्षक डा. मनोज कुमार केसी र सशस्त्र प्रहरी बल, नेपालका महानिरीक्षक नारायणदत्त पौडेल सहभागी थिए। प्रधानमन्त्री शाहले उनीहरूबाट देशको वर्तमान सुरक्षा अवस्था, सम्भावित चुनौतीहरू र चाडपर्व लक्षित सुरक्षा तयारीका विषयमा विस्तृत जानकारी लिएका थिए।
प्रधानमन्त्री शाहले देशको सुरक्षा संयन्त्रलाई थप सुदृढ पार्न अन्तर-निकाय समन्वयको आवश्यकता औँल्याए। उनले नेपाली सेना, नेपाल प्रहरी र सशस्त्र प्रहरी बलबीचको आपसी समन्वय, गुप्तचर सूचनाको आदानप्रदान र सहकार्यलाई अझ प्रभावकारी तथा परिणाममुखी बनाउन सुरक्षा प्रमुखहरूलाई स्पष्ट निर्देशन दिए।
आम नागरिकमा सुरक्षाको पूर्ण प्रत्याभूति गराउन सरकार प्रतिबद्ध रहेको सन्देश दिँदै प्रधानमन्त्रीले अपराध नियन्त्रणमा कठोर बन्न निर्देशन दिएको सचिवालयले जनाएको छ। सचिवालयका अनुसार, ‘नागरिकको जीउधनको सुरक्षामा कुनै पनि कमजोरी हुन नदिन र अपराध नियन्त्रणमा शून्य सहनशीलताको नीति अपनाउनुस्,’ प्रधानमन्त्रीको निर्देशन थियो।
