काभ्रेपलाञ्चोक जिल्लामा सार्वजनिकस्थलमा सुर्तीजन्य पदार्थको बिक्री र सेवनमा रोक लगाउन निर्देशन जारी गरिएको छ। जिल्लास्तरीय विपद् व्यवस्थापन समितिको बैठकले नेपाल सरकारको कानुनी व्यवस्था कडाइका साथ लागू गर्न स्थानीय तहलाई आदेश दिएको हो।
समितिले स्थानीय तहहरूलाई आफ्नो कार्यक्षेत्रभित्रका सार्वजनिकस्थलको तत्काल अनुगमन गर्न भनेको छ। तोकिएको स्थानबाहेक १०० मिटर वरिपरि सुर्तीजन्य पदार्थको बिक्री तथा सेवन बन्द गराउन पनि निर्देशन दिइएको छ।
सरकारले यसअघि सार्वजनिकस्थलमा सुर्तीजन्य पदार्थको बिक्री र सेवनमा प्रतिबन्ध लगाउने निर्णय गरेको थियो। सोही निर्णय कार्यान्वयनको सिलसिलामा जिल्लास्तरीय बैठकले स्थानीय सरकारहरूलाई जिम्मेवारी सुम्पिएको छ।
