रौतहटको गुजरा नगरपालिका–७ का सात वर्षीय छोटेलाल रामको सर्पदंशपछि झारफुक गराउने क्रममा मृत्यु भएको छ। शुक्रबार बिहान करिब ३ बजे विषालु सर्पले टोकेपछि परिवारले तत्काल स्वास्थ्य संस्था लैजानुको सट्टा गाउँकै झाँक्रीकहाँ पुर्याएका थिए।
झारफुककै क्रममा बालकको अवस्था गम्भीर बनेपछि परिवारले चन्द्रपुरस्थित सरकारी अस्पताल पुर्याएका थिए। चिकित्सकले अस्पताल पुर्याउँदा बालकलाई मृत घोषणा गरेका हुन्।
सर्पदंशजस्तो संवेदनशील अवस्थामा समयमै उपचार नपाउँदा बालकको ज्यान गएको घटनाले ग्रामीण क्षेत्रमा झारफुकमा निर्भर हुने प्रवृत्ति कति जोखिमपूर्ण छ भन्ने देखाएको छ। विषालु सर्पले टोकेपछि केही मिनेटदेखि घण्टाभित्रै विषको असर फैलिन सक्छ।
वर्षायाममा सर्पदंशका घटना बढ्ने भएकाले स्थानीय तह र स्वास्थ्य संस्थाले ग्रामीण क्षेत्रमा जनचेतनामूलक अभियान सञ्चालन गर्नुपर्छ। सर्पदंशको प्राथमिक उपचार तथा तत्काल अस्पताल पुर्याउनुपर्ने विषयमा सचेत गराउनु आवश्यक छ।
