अविरल वर्षा, बाढी र पहिरोले देशभरका मुख्य राजमार्ग ठप्प पारेको छ। प्रहरी प्रधान कार्यालयका अनुसार कोशी, बागमती र कर्णाली प्रदेशका सडक खण्डमा पहिरो र बाढीले यातायात अवरुद्ध बनाएको छ।
कोशी प्रदेशको मेची राजमार्ग भदौ २३ गतेदेखि नै पूर्ण रूपमा बन्द छ। इलामको राजदुवालीमा ताप्लेजुङ-झापा सडक अवरुद्ध हुँदा वैकल्पिक मार्ग प्रयोग भइरहेको छ।
बागमती प्रदेशमा पृथ्वी राजमार्गको धादिङको कृष्णभिर र परेवाभिरमा पहिरो खसेको छ। सिन्धुपाल्चोकको कोदारीमा अरनिको राजमार्ग पहिरोले ठप्प छ। रसुवाको उत्तरगया गाउँपालिकाको त्रिशुली मैलुङ स्याफ्रुबेसी सडक र पासाङ ल्हामु सडक खण्ड बाढीले बन्द छन्। सम्भावित जोखिमले केही राजमार्गमा रात्रिकालिन सवारी रोक लगाइएको छ।
कर्णाली प्रदेशको मुगुस्थित छायाँनाथ रारा नगरपालिकाका झ्यारीखोला र टोक्ला क्षेत्रमा पहिरोले नाग्म-मुगु गमगढी सडक खण्ड बन्द गरेको छ।
प्रहरीले यात्रुहरूलाई यात्रा गर्दा विशेष सजगता अपनाउन अनुरोध गरेको छ। अवरुद्ध सडक सुचारु गर्न प्रयास भइरहेको छ।
