नेपाल राष्ट्र बैंकले आज बैंकिङ प्रणालीबाट ४५ अर्ब रुपैयाँ निक्षेप खिच्दैछ। यो कदम ४२ दिनका लागि अधिक तरलता व्यवस्थापन गर्न बोलकबोलमार्फत चालिएको हो।
हाल कुल निक्षेप साढे ७७ खर्ब रुपैयाँभन्दा बढी पुगेको छ। यसले बजारमा तरलताको चाप बढाएको छ।
राष्ट्र बैंकबाट इजाजतप्राप्त ‘क’, ‘ख’ र ‘ग’ वर्गका बैंक तथा वित्तीय संस्थाहरू मात्र यस बोलकबोलमा सहभागी हुनेछन्। रकम बाँडफाँट गर्दा सबैभन्दा कम ब्याजदर बोल गर्नेलाई प्राथमिकता दिइनेछ।
आज संकलन गरिने निक्षेपको सावाँ तथा ब्याज २०८३ असार १२ गते भुक्तानी गरिनेछ। इच्छुक संस्थाहरूले न्यूनतम १० करोड रुपैयाँका लागि बोल गर्न सक्नेछन्। अधिकतम ५ करोड रुपैयाँले भाग जाने गरी कुल आह्वान रकमसम्म बोल गर्न सकिनेछ।
केन्द्रीय बैंकको कार्यविधिले दीर्घकालीन तरलता व्यवस्थापनका लागि ६ महिनासम्मको निक्षेप संकलन उपकरण प्रयोग गर्न अनुमति दिन्छ। सोही कानुनी व्यवस्थाका आधारमा राष्ट्र बैंकले पटक–पटक यस्तो उपकरण प्रयोग गर्दै आएको छ।
