राष्ट्रिय विपद् जोखिम न्यूनीकरण तथा व्यवस्थापन प्राधिकरणले रसुवा बाढीमा १२९४ जनाको मृत्यु भएको पुष्टि गरेको छ। शुक्रबार साँझको पत्रकार सम्मेलनमा प्राधिकरणले १२९४ जनाको शव प्राप्त भएको जनाएको हो।
बाढीमा ५०५३ जना बेपत्ता छन्। १३०९५ जनाको उद्धार गरिएको छ। प्राधिकरणकी प्रवक्ता शान्ति महतका अनुसार रसुवा, नुवाकोट र धादिङका ३७ होल्डिङ सेन्टरमा ४६२७ जना आश्रय लिइरहेका छन्।
७५७० घर पूर्ण क्षतिग्रस्त भएका छन्। यसबाट ३२९३३ नागरिक प्रत्यक्ष प्रभावित भएको प्रारम्भिक आँकलन छ।
सरकारी संरचनामा पनि ठूलो क्षति पुगेको छ। ४८ सरकारी संरचना, १८ विद्यालय र ७ स्वास्थ्य संस्था प्रभावित भएका छन्। प्रवक्ता महतले ५५ किमी सडक पूर्ण क्षतिग्रस्त भएको बताइन्। ३७ मोटरेबल पुल र ६८ झोलुङ्गे पुलमा पनि क्षति पुगेको छ।
कृषि क्षेत्रमा १८०६ हेक्टर जमिन नष्ट भएको छ। यसबाट ७६८६ मेट्रिक टन खाद्यान्न उत्पादन घट्ने आकलन छ। बाढीले पशुधन र कुखुरा पालन व्यवसायमा पनि असर पारेको छ।
ऊर्जा क्षेत्रमा ७८३ मेगावाट विद्युत उत्पादन प्रभावित भएको छ। १३ जलविद्युत आयोजना, एक सोलार प्लान्ट र दुई प्रसारण लाइनमा क्षति पुगेको छ। १७ बैंकका शाखाहरूमा पनि क्षति पुगेको प्राधिकरणले जनाएको छ।
