रसुवाको भोटेकोशी नदीमा आएको बाढीमा परी मृत्यु भएका व्यक्तिको पहिचानका लागि प्रहरी अस्पतालले ५३९ डिएनए नमुना संकलन गरेको छ। यो संख्या सम्पर्कविहीन भएका व्यक्तिका परिवारजनले गराएका हुन्।
प्रहरी अस्पतालका प्रवक्ता रामेश्वर अधिकारीले परिचय खुल्ने कागजात र दुई प्रति फोटोसहित आएका परिवारजनले नमुना दिन सक्ने बताए। अस्पतालले फाराम भर्न सहयोग गरी विशेषज्ञ टोलीबाट नमुना संकलन गर्ने व्यवस्था मिलाएको छ।
सङ्कलित नमुना विधि विज्ञान प्रयोगशाला र प्रज्ञा–प्रतिष्ठानमा पठाइनेछ। प्रहरी टोलीले बाढी प्रभावित क्षेत्रमा शव पहिचान, मुचुल्का र कानुनी प्रक्रिया पूरा गरी शव व्यवस्थापन गरिरहेको छ।
पहिचान नखुलेका शवको हकमा छुट्टाछुट्टै कोड नम्बर दिइएको छ। तस्बिर, हुलिया, कपडा र साथमा फेला परेका सामग्रीको विवरण अभिलेख राखिएको छ। वैज्ञानिक पहिचानका लागि डिएनए नमुना सुरक्षित संरक्षण गरिएको छ।
शव वा शरीरका अङ्गको डिएनए परीक्षणका लागि नजिकको रगतको नाता (बाबु, आमा, छोरा वा छोरी) को नमुना आवश्यक पर्छ। विदेशी नागरिकको हकमा विदेशमै रहेका परिवारजनले डिएनए प्रोफाइलको ‘सफ्ट’कपी प्रहरीको इमेलमा पठाउन सक्नेछन्।
यसैबीच, नेकपा (एमाले) कोशी प्रदेश सभा संसदीय दलले बाढी पीडितलाई प्रधानमन्त्री दैवी प्रकोप उद्धार कोषमा ४ लाख रुपैयाँ सहयोग गर्ने घोषणा गरेको छ। दलका प्रमुख सचेतक रमेश कुमार बस्नेतले विपद्मा परेकाहरूप्रति दुःख व्यक्त गरेका छन्।
सिरहा कारागारका कैदीबन्दीहरूले पनि बाढी प्रभावितका लागि ४५ हजार रुपैयाँ प्रधानमन्त्री दैवी प्रकोप उद्धार कोषमा जम्मा गरेका छन्। कैदीबन्दीहरूले स्वैच्छाले रकम संकलन गरेका हुन्।
