रसुवाको भोटेकोशी नदीमा भदौ १० गते आएको बाढीले बेपत्ता भएका इन्जिनियर अजयप्रसाद सिंहकी श्रीमती पूजा साहले अब आश्वासन होइन, तत्काल उद्धारको माग गरेकी छिन्। १३ दिनसम्म श्रीमान्को कुनै खबर नआएपछि उनले सामाजिक सञ्जालमार्फत भावुक अपिल गरेकी हुन्।
“तिमी जहाँ छौ, जस्तो छौ, मलाई खबर गर, म आफैँ आउँछु, तिमीलाई लिन। बस्, एकपटक तिम्रो आवाज सुन्न र तिमीलाई देख्न पाऊँ,” पूजाले श्रीमान्सँग भनिन्। उनकी सानी छोरीसमेत बुबाको भिडियो कल र आवाजको प्रतीक्षामा छिन्।
पूजाका अनुसार मैलुङ बजार, क्याम्प आसपास, ठाडेगाउँ, राम्चे, ग्राङ, बटार, कालिकास्थान, धुन्चे, भोर्ले, यार्सा, मैलुङडाँडा लगायतका क्षेत्रमा खोजी आवश्यक छ। जङ्गल, पहाडी तथा अन्य सम्भावित स्थानमा ड्रोन र उद्धार टोली परिचालन गर्न उनले आग्रह गरिन्।
उनले उद्धार टोली पठाउने आश्वासन पाए पनि प्रभावकारी खोजी नभएको गुनासो गरिन्। बिहान ड्रोनसहितको टोली घटनास्थल जाने भनिए पनि दिउँसोसम्म नपुगेको उनले बताइन्।
मधेस प्रदेश प्रहरी कार्यालयका अनुसार बाढीमा हराएका २२० जनामध्ये ३८ जना सम्पर्कमा आएका छन्। सप्तरी र बाराका दुई जनाको शव भेटिएको छ भने १८० जना अझै बेपत्ता छन्।
राष्ट्रिय प्रजातन्त्र पार्टी (राप्रपा) का संसदीय दलका नेता ज्ञानेन्द्र शाहीले बेलीब्रिज निर्माणलाई नौलो नभन्दै सुरुङमार्गभित्र फसेका नागरिकको उद्धारमा ध्यान केन्द्रित गर्नुपर्ने बताए। उनले सरकारको राम्रो कामको प्रशंसा र कमजोरीको खबरदारी गर्नुपर्ने बताए।
