मोरङका चन्द्र राई राष्ट्रिय स्वतन्त्र पार्टी (रास्वपा) कोशी प्रदेश सभापतिमा निर्वाचित भएका छन्। ७०२ मत खसेको निर्वाचनमा राईले २८० मत ल्याएर जित हासिल गरे।
उनका प्रतिस्पर्धी सरिन तामाङले १४१ मत, खगेन्द्र कटुवालले ४१ मत र चन्द्रकुमार गौलीले २७ मत पाए। पराजित भएपछि तामाङले राजनीतिबाट अलग हुने घोषणा गरिन्।
तामाङले सामाजिक सञ्जाल फेसबुकमार्फत ‘आजबाट राजनीतिक बिट मारेँ’ लेख्दै मतदातालाई धन्यवाद व्यक्त गरिन्। उनले पार्टीभित्र गुटगत राजनीति र समानुपातिक कोटामा आदिवासी जनजातिको प्रतिनिधित्व नहुँदा असन्तुष्टि जनाएकी थिइन्।
स्रोतका अनुसार, तामाङ निकट नेताहरूले चन्द्र राईलाई जिताउन महामन्त्री भूपदेव शाहले भूमिका खेलेको आरोप लगाएका छन्। राईलाई प्रधानमन्त्री बालेन शाह निकट मानिन्छ।
कोशी प्रदेशको नेतृत्वका लागि भएको यस निर्वाचनको अन्तिम मतपरिणाम निर्वाचन कमिटीले सार्वजनिक गरेको छैन।
