राष्ट्रिय स्वतन्त्र पार्टी (रास्वपा) ले निर्वाचित जनप्रतिनिधिलाई जनताले फिर्ता बोलाउन सक्ने ‘राइट टु रिकल’ सम्बन्धी दस्तावेज तयार गर्न ११ सदस्यीय समिति गठन गरेको छ। पार्टीका महामन्त्री विपिनकुमार आचार्यको संयोजकत्वमा गठित समितिमा सांसद, पार्टी नेता र विभिन्न क्षेत्रका सदस्यहरू छन्।
भदौ ५ गतेको केन्द्रीय कमिटी बैठकको निर्णयअनुसार समिति गठन गरिएको रास्वपाका प्रवक्ता जगदीश खरेलले जारी गरेको विज्ञप्तिमा उल्लेख छ। समितिको मुख्य कार्य ‘राइट टु रिकल’ को अवधारणा, कानुनी आधार, कार्यान्वयन प्रक्रिया र आवश्यक व्यवस्थाबारे अध्ययन गरी पार्टीका लागि प्रतिवेदन तयार गर्नु हो।
समितिका सदस्यहरूमा गणेश पराजुली, मनिष झा, समीक्षा बास्कोटा, अनुष्का श्रेष्ठ, सुलभ खरेल, मनिष खनाल, सुशान्त वैदिक, गजला शमिम मिकरानी, करिस्मा कठरिया र प्रमोद न्यौपाने छन्।
