रौतहटमा बोक्सीको आरोपमा ५५ वर्षीया एकल महिलालाई मलमूत्र खुवाएर अमानवीय यातना दिने राजेन्द्र माझीसहित दुई फरार अभियुक्त पक्राउ परेका छन्।
कटहरीया नगरपालिका–९ डुमरिया टोलकी ती महिलालाई बोक्सीको आरोप लगाइएको थियो।
स्थानीय गौरी साह कलवारसहितका व्यक्तिहरूले ‘आफ्नो आफन्तलाई बिरामी बनाएको’ भन्दै गालीगलौज गरे।
उनीहरूले ती महिलालाई लछारपछार, कुटपिट गर्नुका साथै मलमूत्र समेत खुवाएर अपमानित गरेका थिए।
यस घटनामा फरार रहेका राजेन्द्र माझीलाई प्रहरीले नियन्त्रणमा लिएको हो। प्रहरीले घटनाबारे थप अनुसन्धान गरिरहेको छ।
यसैगरी, बैंकिङ कसुर मुद्दामा फरार अर्का प्रतिवादी सफरुदिन कुमार देवान पनि पक्राउ परेका छन्।
राजेश कुमार साहको जाहेरीमा चन्द्रनिगाहपुर–९ डुमरियाका ३८ वर्षीय देवान जेठ १ गते पक्राउ परे।
जिल्ला प्रहरी कार्यालय रौतहटका सूचना अधिकारी विष्णु प्रदिप बस्यालले अनुसन्धान अगाडि बढेको जानकारी दिए।
