नेपाल वायुसेवा निगम (एनएसी) ले बाढी तथा प्राकृतिक विपद्बाट प्रभावित नागरिकका लागि पठाइने राहत सामग्री ढुवानीमा एक महिनाका लागि आफ्ना सम्पूर्ण शुल्क छुट गर्ने निर्णय गरेको छ। यो निर्णय संस्थागत सामाजिक उत्तरदायित्व अन्तर्गत गरिएको हो।
अन्तर्राष्ट्रिय स्टेसनबाट नेपाल पठाइने राहत सामग्रीमा लाग्ने निगमसँग सम्बन्धित सबै शुल्क पूर्ण रूपमा छुट गरिनेछ। यसका लागि सम्बन्धित दूतावाससँग समन्वय गरी दूतावासको आधिकारिक पत्र आवश्यक पर्नेछ।
यो छुट खाद्यान्न, औषधि, लत्ताकपडा तथा अन्य अत्यावश्यक राहत सामग्री ढुवानीमा लागू हुनेछ। निगमले विपद्को समयमा मानवीय सहयोगलाई सहज र प्रभावकारी बनाउन यो कदम चालेको बताएको छ।
यस निर्णयले विभिन्न मुलुक तथा संघसंस्थाबाट पठाइने राहत सामग्री प्रभावित समुदायसम्म छिटो पुग्ने विश्वास निगमले व्यक्त गरेको छ।
