संघीय सरकारले चालु आर्थिक वर्षको ११ महिनामा १० खर्ब ७९ अर्ब ६३ करोड ४७ लाख रुपैयाँ राजस्व संकलन गरेको छ। यो चालु आर्थिक वर्षभरिका लागि निर्धारित १४ खर्ब ८० अर्ब रुपैयाँको लक्ष्यको ७३.०६ प्रतिशत हो। महालेखा नियन्त्रक कार्यालयको तथ्यांक अनुसार, ११ महिनाको अवधिमा कुल राजस्व संकलन लक्ष्यभन्दा करिब २७ प्रतिशतले पछाडि परेको छ।
कर राजस्व शीर्षकमा सरकारले १३ खर्ब २५ अर्ब ५८ करोड ३९ लाख रुपैयाँ संकलन गर्ने लक्ष्य राखेको थियो। तर, ११ महिनाको अवधिमा नौ खर्ब ७९ अर्ब ६८ करोड ७८ लाख रुपैयाँ मात्र संकलन भएको छ, जुन लक्ष्यको ७४.०३ प्रतिशत हो।
गैरकर राजस्वतर्फ एक खर्ब ५४ अर्ब ४१ करोड ६१ लाख रुपैयाँ संकलन गर्ने लक्ष्यमा ९९ अर्ब ९४ करोड ६९ लाख रुपैयाँ मात्र संकलन भएको छ। यो गैरकर राजस्वको लक्ष्यको ६४.७३ प्रतिशत मात्र हो।
अनुदानतर्फ ५३ अर्ब ४४ करोड ६९ लाख रुपैयाँ संकलन गर्ने लक्ष्य राखिएकोमा ११ महिनाको अवधिमा २२ अर्ब ८८ करोड ५९ लाख रुपैयाँ मात्र प्राप्त भएको छ। यो अनुदान लक्ष्यको ४२.८२ प्रतिशत मात्र हो।
