सप्तरीको बलान बिहुल गाउँपालिकामा पटका तस्कर समूहले प्रहरी चौकीका इन्चार्ज असई प्रदीपकुमार बिष्टमाथि आक्रमण गरेको छ।
प्रहरीले बोदेबरसाईन नगरपालिका–३ का रामदुलार यादवलाई शनिबार साँझ भारतबाट १ लाख १७ हजार रुपैयाँ बराबरको पटकासहित नियन्त्रणमा लिएको थियो। पक्राउ परेका यादवलाई छुटाउन पुगेको समूहले प्रहरीमाथि आक्रमण गरेको सप्तरी प्रहरीले जनाएको छ।
जिल्ला प्रहरी कार्यालय सप्तरीका प्रमुख एसपी रूपक खड्काका अनुसार, पक्राउ परेका यादवलाई इलाका प्रहरी कार्यालय कडबोनामा राखेर थप अनुसन्धान भइरहेको छ। घटनामा संलग्न रहेको आरोप लागेका देवकुमार यादवसहित अन्य व्यक्तिको खोजी भइरहेको एसपी खड्काले बताए।
एसपी खड्काले घटनामा संलग्न कसैले पनि उन्मुक्ति नपाउने भन्दै उनीहरूको पहिचान र पक्राउका लागि प्रहरी परिचालन गरिएको जानकारी दिए। यसअघि गत असारमा पनि सोही रामनगर कोदरकट्टी प्रहरी चौकीका तत्कालीन इन्चार्ज असई रामकुमार यादवमाथि तस्कर समूहले कुटपिट गरेको थियो।
