सर्लाहीको कविलासीस्थित सलेमपुरमा प्रहरीमाथि आक्रमण भएको छ। दुर्घटनाको विषयमा विवाद हुँदा मधेस प्रदेशका पूर्वसांसद अशोककुमार यादव संलग्न रहेको र उनी फरार रहेका छन्। सर्लाही प्रहरीले यादवलाई पक्राउ गर्न खोजे पनि उनी फेला परेका छैनन्।
पूर्वसांसद यादवविरुद्ध अभद्र व्यवहार सम्बन्धी कसुरमा अनुसन्धान भइरहेको छ। उनी २०७४ मा मधेसी जनअधिकार फोरमको तर्फबाट प्रदेशसभा सदस्य थिए। हाल उनी नेपाली कम्युनिस्ट पार्टीमा आबद्ध छन्।
जेठ २५ गते राति ९ बजेतिर यादवको स्वामित्वमा रहेको ज. १ त. २५५० नम्बरको ट्याक्टरले रोकेर राखेको ना. ६ख. ७६२३ नम्बरको ट्रकलाई ठक्कर दिएको थियो। प्रहरीले दुवै सवारी चालकलाई छलफलका लागि बोलाएपछि ट्याक्टर चालकले अशोक यादवलाई खबर गरेका थिए।
यादव घटनास्थलमा पुगेपछि उनीसँगै गएका व्यक्तिहरूले प्रहरीलाई घेरेर आक्रमण गरे। यादव नेतृत्वको समूहले प्रहरीलाई आक्रमण गरेर ट्याक्टर भगाएको एसपी रवीन्द्र पौडेलले बताए। उहाँहरूले तथानाम गाली गर्दै प्रहरीमाथि आक्रमण गर्नुभएको थियो।
यस घटनामा संलग्न दुई जनालाई प्रहरीले पक्राउ गरेको छ। पक्राउ पर्नेमा यादवका भतिज १९ वर्षीय विक्रमकुमार यादव र भाञ्जा भारतीय नागरिक २१ वर्षीय प्रियाङ्शु यादव छन्। उनीहरूविरुद्ध प्रहरीले अभद्र व्यवहार कसुरमा म्याद थप गरेर अनुसन्धान गरिरहेको छ।
