सर्लाहीको मलंगवा नगरपालिकामा निर्माणाधीन चारतल्ले घरको छत भत्किँदा दुई मजदुरको मृत्यु भएको छ।
रंजित यादवको घरमा पानी ट्यांकीका लागि ढलान प्लास्टर गर्ने क्रममा बुधबार अपराह्न पौने पाँच बजे छत खसेको थियो। दुर्घटनामा मलंगवा–२ का ५० वर्षीय छटु साह र हरिपुर्वा–२ का ४० वर्षीय राजकिशोर यादवको ज्यान गएको छ।
गम्भीर घाइते दुवैलाई उपचारका लागि प्रादेशिक अस्पताल मलंगवा पुर्याइएको थियो। अस्पतालले साँझ उनीहरूलाई मृत घोषणा गरेको थियो।
घटनास्थल जिल्ला प्रहरी कार्यालय सर्लाहीबाट करिब २ किलोमिटर उत्तरमा छ। प्रहरीले घटनाबारे थप अनुसन्धान गरिरहेको छ।
