मधेस प्रदेशका निलम्बित प्रदेशसभा सदस्य सरोज कुमार सिंहलाई विशेष अदालतले भ्रष्टाचार मुद्दामा दोषी ठहर गर्दै ४ वर्ष १ महिना कैद र ३८ लाख ५० हजार १३९ रुपैयाँ जरिवानाको फैसला सुनाएको छ। मंगलबार विशेष अदालतका अध्यक्ष सुदर्शनदेव भट्ट तथा सदस्यहरू उमेश कोइराला र विदुर कोइरालाको इजलासले यो फैसला गरेको हो।
अदालतले ‘अपराध पीडित संरक्षण ऐन, २०७५’ बमोजिम सिंहबाट १ लाख ५४ हजार ५ रुपैयाँ ५६ पैसा क्षतिपूर्ति शुल्क असुल गरी ‘पीडित राहत कोष’ मा जम्मा गर्न आदेश दिएको छ। घुस बापत लिएको ३८ लाख ५० हजार १३९ रुपैयाँ सरकारी कोषमा जफत गरिनेछ।
महोत्तरी क्षेत्र नं. ४ ‘ख’ बाट निर्वाचित सिंहले विभिन्न उपभोक्ता समितिहरूबाट कुल ३८ लाख ५० हजार १३९ रुपैयाँ घुस लिएको पुष्टि भएको छ। प्रतिवादी सिंहले रकम लिएको सम्बन्धमा विवाद नगरेकाले अदालतले सोही रकमलाई भ्रष्टाचारको ‘बिगो’ कायम गरेको हो।
सिंहले स्वकीय सचिव विनोद कुमार लाल कायस्थ मार्फत उपभोक्ता समितिको खाताबाट रकम झिकाएका थिए। ती रकम आफ्नो र श्रीमतीको नाममा रहेको संयुक्त खातामा जम्मा गरी हिनामिना गरेको अभियोगमा उनीमाथि मुद्दा चलेको थियो।
