सिरहा । गोलबजार प्रहरीले करिब २८ किलो गाँजासहित तीन जनालाई नियन्त्रणमा लिएको छ। प्रहरीले गोलबजार ७ चोहर्वाबाट ५ किलो ७१५ ग्राम गाँजासहित दुई जनालाई र गोलबजार १० नम्बर वडाबाट २२ किलो गाँजासहित एक जनालाई सोमबार राति पक्राउ गरेको हो।
गोलबजार ७ चोहर्वामा गाँजा कारोबार भइरहेको सूचना पाएपछि प्रहरीले धर्मपुरबाट चोहर्वा आउँदै गरेको नम्बर नभएको इलेक्ट्रिक अटो रोकी चेक गर्दा बोरामा ५ किलो ७१५ ग्राम गाँजा फेला पारेको थियो। प्रहरीले अटो चालक रोकेन्द्र बहादुर सुनुवार र भारत बिहारका रोहित कुमारलाई नियन्त्रणमा लियो।
रोहित कुमारसँगको सोधपुछपछि प्रहरी छक बहादुरको घर पुगेको थियो। इलाका प्रहरी कार्यालय गोलबजारका प्रमुख सुधन केसीका अनुसार छक बहादुरको घरमा खानतलासी गर्दा चार बोरामा थप २२ किलो गाँजा बरामद भएको थियो।
जिल्ला प्रहरी कार्यालय सिरहाले घटनाबारे थप अनुसन्धान भइरहेको जनाएको छ।
