सिराहाको कचनारी सीमा नजिक मदिरा तस्करी रोक्ने क्रममा सशस्त्र प्रहरी नायब निरीक्षक (सई) लक्ष्मणप्रसाद यादवको हत्यामा संलग्न मुख्य अभियुक्त भारतीय नागरिक मोहम्मद कुर्बान मन्सुरीलाई प्रहरीले गोली हानी पक्राउ गरेको छ। करिब २२ महिनादेखि फरार रहेका मन्सुरीलाई प्रहरी उपरीक्षक वासुदेव पाठकको टोलीले असोज ३ गते साँझ पक्राउ गरेको हो।
मन्सुरी घटनामा प्रयोग भएको टाटा सफारी गाडीका धनी तथा चालक हुन्। २०८१ मङ्सिर १६ गते बिहान करिब ३:१० बजे सीमा क्षेत्रमा मदिरा तस्करी रोक्न खोज्दा प्रहरीले रोकेको गाडीले सई यादवलाई ठक्कर दिएको थियो। गम्भीर घाइते यादवको उपचारका क्रममा मृत्यु भएको थियो।
फरार मन्सुरीलाई पक्राउ गर्न खोज्दा उनले प्रहरी टोलीमाथि एक राउन्ड गोली चलाएका थिए। जवाफी कारबाहीमा तीन राउन्ड गोली चलाउँदा मन्सुरीको बायाँ हातको कुहिना र दायाँ खुट्टाको घुँडामा गोली लागेको प्रहरीले जनाएको छ। घाइते मन्सुरीलाई उपचारका लागि प्रादेशिक अस्पताल सिराहामा भर्ना गरिएको छ।
मन्सुरीमाथि ड्युटीमा रहेका सशस्त्र प्रहरीमाथि ज्यान मार्ने उद्देश्यले गाडी प्रयोग गरी आक्रमण गरेको र संगठित अपराधसम्बन्धी कसुरमा अनुसन्धान भइरहेको छ। उनी सीमा क्षेत्रमा मदिरा तस्करीमा समेत संलग्न रहेको खुलेको छ।
