सिरहाको लहानस्थित इन्द्रेणी स्कुलका शिक्षकले छात्रावासबाट भागेको आरोपमा ११ वर्षीय विद्यार्थीलाई मरणासन्न हुनेगरी कुटपिट गरेका छन्। यो घटनाले विद्यालयको शैक्षिक वातावरणमाथि प्रश्नचिन्ह खडा गरेको छ।
सप्तरीको बलानविहुल–४ का ती विद्यार्थी इन्द्रेणी स्कुलको छात्रावासमा बस्दै आएका थिए। उनी पटकपटक भागेर दुःख दिएको विद्यालयका संस्थापक देवेन्द्र साहले स्वीकारे। पछिल्लो पटक भाग्दा प्रहरीले फेला पारेपछि विद्यालय प्रशासनलाई विद्यार्थीले दुःख दिएको साहको भनाइ छ।
विद्यार्थीका बुवासँग सम्पर्क गरी लहान ल्याएपछि सामान्य तर्साउन एक–दुई लट्ठीले कुटेको साहले बताए। तर, अभिभावकका अनुसार बालकलाई बाँधेर घोप्टो पारी फलामे छड र प्लास्टिकको पाइपले निर्घात कुटपिट गरिएको थियो।
बालकलाई परिवारजनले घरमा लगेर उपचार गराइरहेका छन्। यो घटनाले सिरहाका केही निजी विद्यालयमा विद्यार्थीलाई अनुशासनमा राख्ने बहानामा यातना र कुटपिट हुने पुरानो प्रवृत्तिलाई पुनः उजागर गरेको छ।
अधिकारकर्मीहरूका अनुसार यस्ता घटनाहरूमा प्रायःजसो आर्थिक लेनदेनमा मिलाउने प्रयास हुने गरेको छ। सरोकारवालाको मौनताले बालबालिकाहरू विद्यालयमा यातना भोग्न बाध्य छन्।
