सुदूरपश्चिम प्रदेशका प्रायः सबै जिल्लामा आज बिहानैदेखि मेघगर्जनसहित मध्यमदेखि भारी वर्षा भइरहेको छ। जल तथा मौसम विज्ञान कार्यालय, अत्तरियाका अनुसार प्रदेशका हिमाली, पहाडी र तराईका सबैजसो स्थानमा वर्षाले जनजीवन प्रभावित भएको छ।
कार्यालय प्रमुख इन्जिनियर सञ्जयकुमार साहले पहाडी क्षेत्रमा सामान्य बदली रही धेरै स्थानमा मेघगर्जनसहित मध्यम वर्षा र केही स्थानमा भारी वर्षा भएको जानकारी दिए। हालसम्म सबैभन्दा बढी वर्षा कञ्चनपुरको बेलौरीमा ७९.६ मिलिमिटर रेकर्ड भएको छ, भने अत्तरियामा १२ मिलिमिटर पानी परेको छ।
यहाँका नदीहरूको बहाव सामान्य चेतावनी तहमा पुगेको छ। इन्जिनियर साहले आजको तुलनामा भोलि (सोमबार) अझ बढी पानी पर्ने सम्भावना रहेकाले नदी तथा खोलाको सतह बढ्ने चेतावनी दिएका छन्। त्यसैले, नदी तटीय क्षेत्रमा बसोबास गर्ने नागरिकहरूलाई विशेष सतर्कता अपनाउन आग्रह गरिएको छ।
आज राति सुदूरपश्चिमका हिमाली क्षेत्रमा केही स्थानमा मेघगर्जन र चट्याङसहित मध्यम वर्षाको सम्भावना छ। पहाडी र तराई क्षेत्रमा पनि धेरै स्थानमा मेघगर्जन, चट्याङसहित मध्यम वर्षा तथा थोरै स्थानमा भारी वर्षाको सम्भावना रहेको मौसमविद्हरूले बताएका छन्।
