सुदूरपश्चिमका मुख्यमन्त्री कमलबहादुर शाहले निरन्तरता पाएका छन्। उनले मन्त्रिपरिषद पुनर्गठनको तयारी गरेका छन्। कांग्रेस संसदीय दलको नेताबाट उनलाई हटाउन सक्रिय पक्षले दुई मन्त्री र एक राज्यमन्त्री पाउने भएपछि यो पुनर्गठन हुन लागेको हो।
मुख्यमन्त्रीविरुद्ध हस्ताक्षर गरेका ८ जनासँग भएको सहमति अनुसार सरकार पुनर्गठनको तयारी गरिएको छ। मुख्यमन्त्रीको तर्फबाट प्रमुख सचेतक विक्रम धामी, बहादुरसिंह थापा र प्रकाश बमले असन्तुष्ट पक्षसँग वार्ता गरेका थिए। वार्तामा असन्तुष्ट पक्षले दुई मन्त्री र एक राज्यमन्त्रीमा सहमति जनाएको छ।
हाल सुदूरपश्चिममा कांग्रेसले मुख्यमन्त्रीसहित तीन मन्त्री र दुई राज्यमन्त्री पाएको छ। नयाँ सहमति अनुसार असन्तुष्ट पक्षले दुई मन्त्री र एक राज्यमन्त्री पाउनेछन् भने मुख्यमन्त्रीसहित एक मन्त्री र एक राज्यमन्त्री सत्ता पक्षकै रहनेछन्।
सुदूरपश्चिम प्रदेशमा कांग्रेस नेतृत्वको सरकार छ। पार्टीभित्रको असन्तुष्ट पक्षले संसदीय दलको नेता परिवर्तनका लागि जेठ ८ गते ९ जनाले हस्ताक्षर गरेका थिए।
