सुदूरपश्चिम प्रदेशका मुख्यमन्त्री कमलबहादुर शाहले राजीनामा दिने भएका छन्। नेपाली कांग्रेस संसदीय दलको बैठकले यस विषयमा निर्णय लिनेछ।
एमालेले समर्थन फिर्ता लिएपछि अल्पमतमा परेका शाहले बिहीबार पदमुक्त हुने संवैधानिक समयसीमा नजिकिँदै गर्दा राजीनामा दिन लागेका हुन्। ३१ असारमा बजेट विवादपछि एमालेका चार मन्त्री बर्खास्त भएका थिए। सोही दिन एमालेले सरकारलाई दिएको समर्थन फिर्ता लिएको थियो।
मुख्यमन्त्रीका प्रेस सल्लाहकार डम्बरबहादुर बमका अनुसार शाहले बिहीबार प्रदेश प्रमुखसमक्ष राजीनामा बुझाउने तयारी गरेका छन्। विश्वासको मतका लागि आवश्यक बहुमत जुट्ने अवस्था नदेखिएपछि उनले राजीनामा दिने निष्कर्षमा पुगेका हुन्।
शाहले राजीनामा दिएसँगै सुदूरपश्चिममा नयाँ सरकार गठनको प्रक्रिया सुरु हुनेछ। केन्द्रमा नेकपा र एमालेबीच भएको सहमतिअनुसार नेकपाका तर्फबाट खगराज भट्ट मुख्यमन्त्री बन्ने तयारी छ। प्रदेश सरकारको नेतृत्वका विषयमा नेकपाभित्र केही मतभिन्नता देखिए पनि पार्टी केन्द्रको पहलमा विवाद निरुपण भइसकेको बताइएको छ।
कमलबहादुर शाह २० साउन २०८१ मा नेकपा एमालेको समर्थनमा दोस्रोपटक मुख्यमन्त्री नियुक्त भएका थिए। यसअघि उनी २६ माघ २०७९ मा पहिलोपटक मुख्यमन्त्री बनेका थिए।
