सुनसरीको इनरुवामा टिपरमा मोटरसाइकल ठोक्किएर भएको दुर्घटनामा एक जनाको मृत्यु भएको छ भने दुई जना घाइते भएका छन्।
झुम्काबाट इनरुवा जाँदै गरेको प्रदेश १-०२-०४३ प ५८२२ नम्बरको मोटरसाइकल गएराति करिब ११ बजे सडक छेउमा रोकिराखेको को १ख ५१२८ नम्बरको टिपरमा पछाडिबाट ठोक्किएको थियो।
दुर्घटनामा मोटरसाइकल चालक इनरुवा नगरपालिका-८ का २९ वर्षीय विनोद चौधरी गम्भीर घाइते भएका थिए। टाउकोमा गहिरो चोट लागेका उनलाई उपचारका लागि विराट नर्सिङ होम विराटनगर लगिएकोमा राति नै मृत्यु भएको जिल्ला प्रहरी कार्यालय सुनसरीले जनाएको छ।
मोटरसाइकलमा पछाडि सवार इनरुवा-८ का २० वर्षीय आर्यन चौधरी र २८ वर्षीय आशिष चौधरी घाइते भएका छन्।
प्रहरीले टिपर चालक सुनसरीको कोशी गाउँपालिका-३ का ४८ वर्षीय लालमोहमद मियाँलाई नियन्त्रणमा लिएको छ।
प्रारम्भिक अनुसन्धानमा मोटरसाइकल चालकको लापरवाही र तीव्र गतिको कारण दुर्घटना भएको खुलेको छ।
