पश्चिम नवलपरासीको सुस्ता गाउँपालिका–५ मा निर्माणाधीन अस्थायी बाँध आइतबार भारतीय सशस्त्र सीमा बल (एसएसबी) ले भत्काइदिएको छ। आइतबार दिउँसो करिब ३:३० बजे हतियारसहित ५०/६० जनाको समूहमा नेपाल प्रवेश गरेका एसएसबीले सिमलको रुखभन्दा करिब ३ सय मिटर नेपालतर्फ आएर बाँध भत्काएको हो।
भारतीय सुरक्षाकर्मीको यो कदमको स्थानीय नेपालीहरूले प्रतिवाद गरेका थिए। प्रतिवाद गर्ने क्रममा दुई पक्षबीच झडप हुँदा तीन जना नेपाली नागरिक घाइते भएका छन्। घटनाको जानकारी पाउनासाथ सशस्त्र प्रहरी बलको टोली घटनास्थलमा पुगेको छ।
