चीनसँगको उत्तरी नाका जोड्ने रसुवाको स्याफ्रुबेँसीमा ७६ मिटर लामो बेलिब्रिज निर्माणका लागि फाउन्डेसन (जग) निर्माणको काम सुरु भएको छ। पूर्वाधार विकास मन्त्रालयका अनुसार नदीका दुवैतर्फ उपकरण परिचालन गरी सडकको अस्थायी ट्र्याक निर्माणसँगै पुलको जग खन्ने काम अघि बढाइएको हो।
बेलिब्रिज जडानका लागि १४ मिटर अग्लो फाउन्डेसन उठाउन दुई वटा एक्साभेटर प्रयोग गरिएको छ। यसअघि बेत्रावतीमा निर्माणाधीन बेलिब्रिज जडानको काम अन्तिम चरणमा पुगेसँगै स्याफ्रुबेँसीमा पनि पूर्वाधार निर्माणलाई तीव्रता दिइएको हो।
स्याफ्रुबेँसीमा बेलिब्रिज निर्माण सम्पन्न भएपछि बाढी र पहिरोले अवरुद्ध बनेको रसुवागढीसम्मको मुख्य सडक सञ्जाल पुनःस्थापित हुनेछ। बाढीका कारण क्षतिग्रस्त गल्छी–बेत्रावती सडकखण्डमा अस्थायी ट्र्याक यसअघि नै खुलिसकेको छ।
बेत्रावतीमा बेलिब्रिज जडानको काम नेपाली सेनाले गरिरहेको छ। सेनानी चिरञ्जीवी चौलागाईंका अनुसार बेत्रावतीमा ६० टनसम्म भार धान्न सक्ने २४० फिट लामो पुलका सामग्री असोज १९ गतेसम्म घटनास्थलमा पुर्याइएको थियो। बेत्रावतीमा बेलिब्रिज अबको आठ/१० दिनमा सञ्चालनमा आउने गरी काम भइरहेको गोरखापत्रले जनाएको छ।
पूर्वाधार विकास मन्त्रालयका सचिव पद्यकुमार मैनालीका अनुसार बाढी, पहिरो तथा जलवायुजन्य विपद्का कारण मुलुकका पूर्वाधार संरचनामा २ खर्ब २७ अर्ब रुपैयाँ बराबरको प्रारम्भिक क्षति पुगेको छ। तत्काल पुनर्निर्माणका लागि ६३ अर्ब रुपैयाँ आवश्यक रहेको उनले बताए।
