सर्लाहीको गोडैता नगरपालिका–१० सिसौटियाका ३५ वर्षीय विवेक मण्डलले शरीरमा आगो लगाएर आत्मदाहको प्रयास गरे। विज्ञानमा स्नातकोत्तर (एमएस्सी) गरेका मण्डलको शरीरको अधिकांश भाग जलेको छ। प्रहरीका अनुसार उनको अवस्था गम्भीर छ। प्राथमिक उपचारपछि थप उपचारका लागि काठमाडौंको कीर्तिपुरस्थित बर्न अस्पताल पठाइएको छ।
परिवारका अनुसार मण्डल करिब एक वर्षअघिसम्म महोत्तरीको गौशालास्थित एक विद्यालयमा तीन वर्ष शिक्षक थिए। विद्यालयभित्रको राजनीतिक चलखेलले गर्दा जागिर छोड्न बाध्य भएको परिवारको दाबी छ। सहकर्मीहरूले पनि उनी सक्षम शिक्षक भए पनि विद्यालयको राजनीतिले गर्दा जागिर गुमाउनुपरेको बताएका छन्।
शिक्षण पेसा छाडेपछि उनले लोक सेवा आयोगका परीक्षामा समेत सहभागी भए तर सफलता पाएनन्। लगातारको असफलताले मानसिक रूपमा कमजोर बन्दै गएको परिवारको भनाइ छ। श्रीमती रिनादेवी मण्डलका अनुसार उच्च शिक्षामा बाबुआमाले ठूलो लगानी गरे पनि परिवारको अपेक्षा पूरा गर्न नसकेको भन्दै विवेक चिन्तित हुने गर्थे। बेरोजगारी लम्बिँदै जाँदा उनी झन् निराश भएका थिए।
आमा मन्टुटिया देवीका अनुसार आर्थिक अभाव र लामो समयसम्म रोजगारी नपाउँदा उनी मानसिक तनावमा थिए। केही समयअघि उनको उपचारसमेत गरिएको थियो। बुवा उपेन्द्र मण्डलका अनुसार विवेकको अध्ययन र घर खर्चका लागि गाउँघर तथा बैंकबाट लिएको गरी करिब ३५ लाख रुपैयाँ ऋण तिर्न बाँकी छ।
एमएस्सीपछि शिक्षकको जागिरले आर्थिक अवस्था सुध्रिने आशा थियो। तर, त्यो रोजगारी टिक्न नसकेपछि परिवार फेरि संकटमा परेको हो। विवेकका श्रीमती, एक छोरा र एक छोरी छन्। अहिले उनको उपचारका लागि परिवार आर्थिक कठिनाइमा छ।
