तराईका केही भूभागमा तातो हावा चल्ने सम्भावना छ। जल तथा मौसम विज्ञान विभागका अनुसार उपल्लो वायुमण्डलमा रहेको पश्चिमी न्यून चापीय रेखा र स्थानीय वायुको प्रभावले देशभर चट्याङसहित वर्षाको सम्भावना देखिएको छ।
हाल कोशी, बागमती, गण्डकी, लुम्बिनी, कर्णाली र सुदूरपश्चिम प्रदेशका हिमाली तथा पहाडी भेगमा सामान्य बादल छ। बाँकी भूभागमा आंशिक बादल लागेको छ।
आज दिउँसो कोशी, मधेस, बागमती, गण्डकी र लुम्बिनी प्रदेशका हिमाली तथा पहाडी भेगमा सामान्य बादल लाग्नेछ। सुदूरपश्चिम प्रदेशको तराईमा आंशिक बादल रहनेछ।
कोशी, मधेस, बागमती र गण्डकी प्रदेशका हिमाली तथा पहाडी भेगमा चट्याङसहित मध्यम वर्षाको सम्भावना छ। लुम्बिनी प्रदेशको हिमाली र पहाडी भेग, लुम्बिनी तराई, कर्णाली र सुदूरपश्चिमका हिमाली तथा पहाडी भेगका एक/दुई स्थानमा पनि वर्षा हुनेछ।
बागमती, गण्डकी, लुम्बिनी र सुदूरपश्चिम प्रदेशका तराई भेगका केही स्थानमा आज तातो दिन रहनेछ। ती स्थानमा सतर्कता अपनाउन विभागले अनुरोध गरेको छ।
आज राति कोशी, बागमती र गण्डकी प्रदेशका हिमाली तथा पहाडी भेगमा सामान्य बादल लाग्नेछ। बाँकी हिमाली भेगमा पनि सामान्य बादल रहनेछ। मधेस प्रदेश र बाँकी प्रदेशका पहाडी भेगमा आंशिक बादल लाग्नेछ।
कोशी, बागमती र गण्डकी प्रदेशका हिमाली तथा पहाडी भेगका थोरै स्थानमा चट्याङसहित हल्का वर्षाको सम्भावना छ। मधेस प्रदेश र बाँकी हिमाली भेगका एक/दुई स्थानमा पनि वर्षा हुनेछ।
