विपदग्रस्त नेपालका बाढीपहिरो पीडितको उद्धार र पुनर्निर्माणका लागि विश्व बैंकले २५ अर्ब रुपैयाँ बराबरको आपतकालीन सहयोग गर्ने भएको छ। चीनले नगद र भारतले आवश्यक राहत सामग्री पठाउने भएका छन्।
विश्व बैंकका राष्ट्रिय निर्देशक डेभिड सिस्लेनले अर्थमन्त्री डा. स्वर्णिम वाग्लेलाई भेटेर यो सहयोगबारे जानकारी दिए। यो रकमले बाढीबाट प्रभावितहरूको तत्काल उद्धार र दीर्घकालीन पुनर्निर्माणमा मद्दत पुग्ने अपेक्षा छ।
छिमेकी मित्रराष्ट्र भारतले बाढीपीडितका लागि आवश्यक तत्कालिन राहत सामग्रीहरूको सूची मागेको छ। परराष्ट्रमन्त्री शिशिर खनालले भारतीय सहयोग सामग्री आजै काठमाडौं ल्याइने तयारी भइरहेको बताए।
उत्तरी छिमेकी चीनले नगद सहयोग गर्ने भएको छ। चिनियाँ राजदूत जाङ्ग माओमिङ्गले अर्थमन्त्रीमार्फत रकम पठाउने प्रक्रिया सुरु गर्न आग्रह गरेका छन्।
अर्थमन्त्री डा. वाग्लेले छिमेकी मुलुक र दातृ निकायको सहयोग प्रतिबद्धताप्रति आभार व्यक्त गरेका छन्। उनले सहयोगको मोडालिटीबारे छलफल गरिरहेका छन्।
मन्त्रिपरिषद् बैठकले रसुवा, नुवाकोट र धादिङका बाढी प्रभावित पालिकाहरूलाई विपद् संकटग्रस्त क्षेत्र घोषणा गरेको थियो। यसले घरेलु तथा बाह्य सहयोग जुटाउने कानुनी बाटो खोलेको छ।
नेपाल अटोमोबाईल इम्पोर्टस एन्ड म्यानुफ्क्चर्स संघ (नाइमा) ले रसुवाको भोटेकोसी नदीमा आएको बाढीबाट भएको जनधनको क्षतिप्रति दुःख व्यक्त गरेको छ। नाइमाले प्रभावित समुदायको उद्धार, राहत तथा पुनर्स्थापनामा सहयोग गर्ने प्रतिबद्धता जनाएको छ। बाढीले सडक, पुल, विद्युत्, सञ्चार पूर्वाधार, सवारीसाधन र बजार क्षेत्रमा ठूलो क्षति पुर्याएको छ।
नाइमाले रसुवा, नुवाकोट, धादिङ, गोरखा, चितवनलगायत सम्भावित प्रभावित क्षेत्रका नागरिकलाई उच्च सतर्कता अपनाउन अनुरोध गरेको छ। सुरक्षित स्थानमा रहन र सुरक्षा सूचना पालना गर्न भनिएको छ।
