कैलालीको गोदावरी सामुदायिक वन क्षेत्रको राजमार्गबाट टेम्पो भिरमा धकेल्ने वन कर्मचारी र पीडितबीच प्रहरीले छलफल गराउने भएको छ। भीमदत्त राजमार्गको गाइमारेमा शनिबार टेम्पोमा व्यापार गरेको आरोपमा वन कर्मचारीले स्थानीयको टेम्पो भिरबाट धकेलेर खसालेका थिए।
टेम्पो खसालेको भिडियो सामाजिक सञ्जालमा भाइरल भएपछि प्रहरीले आइतबार साँझ डिभिजन वन कार्यालय र सब डिभिजन वन कार्यालयका १२ कर्मचारीलाई पक्राउ गरी हिरासतमा राखेको छ। पक्राउ पर्नेमा दुई वन अधिकृत र अन्य वन रक्षकहरू छन्।
कैलालीका एसपी नरेन्द्र चन्दले पहिलो चरणमा कर्मचारी र पीडितबीच छलफल गराइने बताए। उनले भने, ‘पहिलो चरणमा छलफल गराउँछौँ, सहमति नभएमा जाहेरी लिएर अनुसन्धान अघि बढ्छ।’
प्रहरीले पक्राउ परेका कर्मचारीहरूसँग घटनाबारे सोधपुछ गरिरहेको छ। पक्राउ परेका कर्मचारीहरूको नाम भने सार्वजनिक गरिएको छैन। वन कार्यालयको आरोप छ कि टेम्पोलाई टहराको रूपमा प्रयोग गरी वन क्षेत्र अतिक्रमण गरेर व्यापार गरिएको थियो।
