काठमाडौं जिल्ला प्रशासन कार्यालयले सरकारी भवन र सार्वजनिक संरचनाभित्र सञ्चालित गैरसरकारी संस्थालाई ७ दिनभित्र हटाउन निर्देशन दिएको छ। कार्यालयले एक जरुरी सूचना जारी गर्दै यो आदेश दिएको हो।
संस्था दर्ता ऐन, २०३४ अनुसार दर्ता भएका काठमाडौं जिल्लाका प्राविधिक वा पेशागत संघ–संस्थाहरूले सरकारी भवनमा कार्यालय सञ्चालन गरिरहेको पाइएको छ। प्रशासनले यस्ता संस्थालाई तत्काल निजी वा भाडाको भवनमा स्थानान्तरण गर्न भनेको छ।
स्थानान्तरणपछि त्यसको जानकारी जिल्ला प्रशासन कार्यालयमा बुझाउनुपर्नेछ। साथै, सम्पूर्ण सरकारी कार्यालय र सार्वजनिक निकायलाई पनि यस्ता संस्थाका बोर्ड वा संरचना हटाउन निर्देशन दिइएको छ।
सूचनाको अवज्ञा गरेमा प्रचलित कानुनअनुसार कारबाही गरिने प्रशासनले चेतावनी दिएको छ।
