अर्थ मन्त्रालयमा सरकार र लघुवित्त वित्तीय संस्था पीडित सङ्घर्ष समितिबीच दोस्रो चरणको वार्ता जारी छ। माईतीघर मण्डलामा आमरण अनसनमा बसिरहेका पीडितहरूको माग सम्बोधनका लागि सरकारले संवाद प्रक्रिया अघि बढाएको हो।
पहिलो चरणको वार्तामा दुवै पक्षले आ–आफ्नो धारणा स्पष्ट पारेका थिए। आजको बैठकले ठोस निष्कर्ष निकाल्ने अपेक्षा गरिएको छ। अर्थ मन्त्रालयका सहसचिव महेश आचार्यको संयोजकत्वमा गठित वार्ता टोलीमा कानुन मन्त्रालयका सहसचिव विनोदकुमार भट्टराई, गृह मन्त्रालयका सहसचिव सुरेश पन्थी र नेपाल राष्ट्र बैंकका कार्यकारी निर्देशक रामु पौडेल सदस्य छन्। अर्थ मन्त्रालयका उपसचिव बोलराज आचार्य सदस्य सचिव छन्।
लघुवित्तको ऋण मिनाहा हुनुपर्ने लगायतका मागहरूमा केन्द्रित रहेर सहमतिको खाका तयार पार्ने लक्ष्य छ। अनसनरत पक्षका माग सम्बोधन गरी आन्दोलनको अन्त्य गर्न सरकारले वार्ताबाट निकास खोज्न सक्रियता देखाएको छ।
