रसुवाको भोटेकोशीमा भदौ १० गते आएको बाढीले प्रभावित क्षेत्रमा नवौँ दिनसम्म उद्धार, खोजी र शव व्यवस्थापन जारी छ। बाढीले रसुवासहित नुवाकोट, गोरखा, धादिङ, चितवन, तनहुँ र नवलपरासी पूर्वमा ठूलो मानवीय क्षति पुर्याएको छ। त्रिशूली नदीले बगाएका शव विभिन्न स्थानमा भेटिए पनि मृतक, घाइते र बेपत्ताको एकीकृत विवरण अझै सार्वजनिक भएको छैन। प्रहरीका अनुसार ७ हजार ९ सय १२ प्रहरी उद्धार, खोजी, राहत र शव व्यवस्थापनमा खटिएका छन्।
हालसम्म ६ हजार ५ सय ४१ जनाको उद्धार गरिएको छ। ४ हजार ८ सय ५८ जना सम्पर्कविहीन रहेको भन्दै खोजी भइरहेको छ। विभिन्न स्थानमा १ हजार १ सय २७ शव फेला परेको विवरण सार्वजनिक भएको छ। बाढी अचानक र तीव्र गतिमा आउनुको कारणबारे जलवायु विज्ञ र हिमनदी विशेषज्ञहरूले अध्ययन गरिरहेका छन्।
सडक सञ्जाल विच्छेद भएका रसुवा र नुवाकोटका बस्तीमा नेपाली सेना र निजी हेलिकोप्टरले राहत र उद्धार सामग्री पुर्याइरहेका छन्। नेपाल नागरिक उड्डयन प्राधिकरणका अनुसार भदौ १० देखि बुधबारसम्म काठमाडौंबाट २२० हेलिकोप्टर उडान भएका छन्। सेनाले ४३ र निजी कम्पनीले १७७ उडान गरेका छन्।
भोटेकोशी–त्रिशूली बाढीमा ज्यान गुमाएका प्रहरी कर्मचारीका परिवारलाई प्रतिपरिवार १० लाख रुपैयाँ विशेष आर्थिक सहयोग दिइने भएको छ। प्रहरी महानिरीक्षक दानबहादुर कार्कीको अध्यक्षतामा बसेको नेपाल प्रहरी प्रधान कार्यालयको नीति निर्माण समितिको बैठकले यो निर्णय गरेको हो।
गोरखातर्फ त्रिशूली नदीमा बुधबार थप तीन शव भेटिएपछि गोरखामा शव संख्या ६९ पुगेको छ। गोरखा नगरपालिका–१२ अबुँवामा मात्र १६ शव व्यवस्थापन गरियो। गोरखामा फेला परेका ६९ शवमध्ये ५२ को व्यवस्थापन भइसकेको छ। पोखरा पठाइएका ११ शवमध्ये चारको सनाखत भएको छ।
रसुवाका विभिन्न स्थानबाट १३३ शव संकलन गरिएको छ। जिल्ला प्रहरी कार्यालयका अनुसार टिमुरेबाट १०४, स्याफ्रुबेंसी र रोंगाबाट १८, बेत्रावतीबाट ११ शव संकलन गरिए। शव गन्हाउन थालेपछि हेलिकोप्टरमार्फत नुवाकोटको विदुर लैजाने काम भइरहेको छ।
बाढीले बगाएका शव भारतसम्म पुगेका छन्। भारतीय सुरक्षा निकायले उत्तर प्रदेशको कुशिनगरमा फेला परेका नौ शव सुनौली नाकामार्फत नेपाललाई हस्तान्तरण गरेको छ। तीमध्ये चार महिला, पाँच पुरुष र एक बालिका छन्। शव बुटवलस्थित लुम्बिनी प्रादेशिक अस्पताल पठाइएको छ।
पश्चिम नवलपरासीस्थित पृथ्वीचन्द्र अस्पतालमा १४५ शव व्यवस्थापन गरियो। नारायणी नदी किनार र भारतमा भेटिएका थप १९५ शव बर्दघाटको चिसापानी र सुनवलको मूलपानी सामुदायिक वनमा व्यवस्थापन गरिए। पूर्वी नवलपरासीको देवचुलीस्थित दिव्य मध्यवर्ती सामुदायिक वनमा व्यवस्थापन गरिएका शवको सुरक्षाका लागि तारजाली लगाइएको छ।
बाढीमा पालुङटार नगरपालिकाका बासिन्दाको ज्यान गुमाउनुका साथै सम्पर्कविहीन भएपछि नगरपालिकाले बिहीबार शोक बिदा दियो। नगरभित्रका सरकारी कार्यालय, शैक्षिक संस्था र वित्तीय संस्था बन्द रहनेछन्। नुवाकोटका विद्यालयहरू पनि अनिश्चितकालका लागि बन्द गरिएका छन्।
