नेपाल प्रहरीले चाडपर्वका लागि ५० हजार प्रहरी परिचालन गर्दै सार्वजनिक सवारीमा पहिलो पटक ‘मेकानिकल टेस्ट रिपोर्ट’ अनिवार्य गरेको छ। यो योजना २०८३ आश्विन २१ गते बुधबारदेखि देशभर लागू भएको केन्द्रीय प्रहरी प्रवक्ता अविनारायण काफ्लेले बताए।
प्रवक्ता काफ्लेका अनुसार, यो योजना आमनागरिकको जनजीवन सामान्य तुल्याउन, बैंक तथा वित्तीय कारोबार सुरक्षित गराउन र यात्रुलाई पूर्ण सुरक्षाको प्रत्याभूति दिलाउन ल्याइएको हो। चाडपर्वमा हुन सक्ने चोरी, डकैती, जुवातास, तस्करी र सीमा अपराध नियन्त्रण गर्न प्रहरी परिचालन गरिएको उनले स्पष्ट पारे।
५० हजार प्रहरी परिचालन, प्रविधि र सहायता कक्ष
- करिब ५० हजार प्रहरी परिचालन।
- ४०८ यात्रु सहायता कक्ष र १०८ सीमा सहायता कक्ष स्थापना।
- काठमाडौं उपत्यकासहित प्रदेश र जिल्ला प्रहरी कार्यालयमा कमाण्ड पोष्ट स्थापना।
- पैदल, मोबाइल र ग्रामीण गस्तीसहित चेकप्वाइन्टमा ट्राफिक प्रहरीको चेकजाँच।
- ड्रोन, सिसीटिभी, ‘बडीवन’ क्यामरा प्रयोग गरी काठमाडौं उपत्यकासहित प्रमुख सहरका बजार, सपिङ मल, बैंक र सुनचाँदी कारोबार हुने क्षेत्रमा विशेष निगरानी।
- महिला, बालबालिका, लैङ्गिक तथा यौनिक अल्पसङ्ख्यक र ज्येष्ठ नागरिकमाथि हुने हिंसामा शून्य सहनशीलता।
- सरकारी तथा महत्त्वपूर्ण संस्था र कारागारको सुरक्षा मजबुत।
सवारीमा मेकानिकल टेस्ट रिपोर्ट अनिवार्य, दुर्घटना न्यूनीकरण
सवारी दुर्घटना र जनधनको क्षति न्यूनीकरण गर्न प्रहरीले विशेष योजना लागू गरेको छ। यसअन्तर्गत, सवारी चालक अनुमतिपत्र (लाइसेन्स) जाँच कडाइ गरिनेछ भने लामो दूरीका सवारीसाधनमा दुई जना चालक अनिवार्य गरिएको छ।
प्रहरीका अनुसार, सिट क्षमताभन्दा बढी यात्रु राख्न दिइनेछैन। नेपालमा पहिलो पटक सबै सवारीसाधनले यात्रा गर्नुभन्दा सात दिनअघिको ‘मेकानिकल टेस्ट रिपोर्ट’ पेस गर्नुपर्ने व्यवस्था अनिवार्य गरिएको छ। प्रवक्ता काफ्लेले यो नियम कडाइका साथ पालना गराइने बताए।
काठमाडौं उपत्यकाबाट बाहिरिने यात्रुलाई दुःख दिने, महँगोमा टिकट बिक्री गर्ने, कालोबजारी गर्ने र सिट नभएको टिकट जारी गर्ने प्रवृत्ति अन्त्य गर्ने लक्ष्य प्रहरीले लिएको छ। काठमाडौं जिल्ला प्रहरी परिसरले ३ हजार ५०६ जना प्रहरी परिचालन गरेको छ, जसको योजना आगामी २०८३ कात्तिक ३० गतेसम्म सञ्चालन हुनेछ।
आपराधिक गतिविधि नियन्त्रण र विपद् व्यवस्थापन
प्रहरीले चाडपर्वमा चोरी, डकैती, जुवातास, सट्टेबाजी, तस्करी र सीमा अपराधलाई मुख्य सुरक्षा चुनौती औँल्याएको छ। विष्फोटक पदार्थको ओसारपसार, भन्सार छली, बैंक तथा वित्तीय संस्थामा चोरी, लुटपाट, खाद्यान्नको कृत्रिम अभाव, कालोबजारी, म्याद गुज्रिएका सामग्रीको बिक्री, हुण्डी र नक्कली नोट कारोबार पनि चुनौतीका रूपमा रहेका छन्।
सम्भावित विपद्का घटनासँग जुध्न प्रहरीले विशेष टोली तैनाथ गरेको छ। विपद् व्यवस्थापन गुल्मका प्रहरी कर्मचारीलाई २४ सै घण्टा उद्धार, खोज, राहत र सुरक्षाका लागि तयारी अवस्थामा राखिएको प्रवक्ता काफ्लेले जानकारी दिए।
मधेस प्रदेशमा ७ हजार प्रहरी परिचालन
राष्ट्रिय सुरक्षा योजनाअन्तर्गत मधेस प्रदेशमा ७ हजारभन्दा बढी प्रहरी परिचालन गरिनेछ। यसले बडादसैँ, तिहार, नेपाल संवत् र छठलाई शान्तिपूर्ण, सुरक्षित र मर्यादित बनाउने लक्ष्य लिएको छ।
मधेसमा पटका र आतिसबाजीबाट आगलागी, जुवा–तास, अवैध सट्टेबाजी, मादक पदार्थ सेवनबाट झैझगडा, घरेलु हिंसा, पाकेटमारी, चोरी र लुटपाट नियन्त्रणमा विशेष निगरानी बढाइनेछ। सीमा नाकामा चोरी–तस्करी नियन्त्रणका लागि ७३ वटा ड्युटी टोली परिचालन गरिनेछ। भारतबाट घर फर्किने नेपालीहरूको सुरक्षाका लागि जमुनाहा नाकासहित सीमावर्ती क्षेत्रमा यात्रु सहायता कक्ष स्थापना गरी लुटपाट, ठगी र अलपत्र पर्ने घटना रोक्न विशेष सुरक्षा व्यवस्था मिलाइएको छ।
प्रहरीले यो चाडपर्वलाई शान्त, सुरक्षित र व्यवस्थित बनाउन विगतको भन्दा भरपर्दो सुरक्षा व्यवस्था मिलाएको जनाएको छ। यस सुरक्षा व्यवस्थालाई जिल्ला र प्रदेश प्रहरी प्रमुखको कार्यसम्पादनसँग जोडेर हेरिएको प्रवक्ता काफ्लेले बताए।
