छठ मनाउन हिँडेका अवधेश यादवले एकै दुर्घटनामा गुमाए श्रीमतीसहित ६ परिवारका सदस्य

छठ पर्व मनाउन सर्लाहीस्थित घर फर्किने सबै तयारी ललितपुरमा पूरा गरिसकेका अवधेश यादवले गाडीमा ठाउँ नपुग्दा यात्रा स्थगित गरे। तर, उनले स्थगित गरेको त्यही यात्राले श्रीमती, तीन छोरी र दुई भाइसहित परिवारका ६ सदस्यलाई सधैँका लागि खोसेको छ।

मकवानपुरको भीमफेदी गाउँपालिका–६ चिसापानीगढी नजिकै बिहीबार बिहान करिब ५:४५ बजे सडकबाट भिरमा खस्दा मधेस प्रदेश ०३–००१ ज ०८८० नम्बरको गाडी दुर्घटनामा परेको छ, जुन बुधबार मध्यरातपछि करिब २ बजे ललितपुरको टीकाथलीबाट सर्लाहीको चक्रघट्टा गाउँपालिका–४ सुन्दरपुरका लागि छुटेको थियो। अवधेशका अनुसार गाडी भरिएकाले उनले श्रीमती पुनमदेवी यादव, छोरीहरू अनुकुमारी, दीक्षा, दीपिका र दुई भाइ विकेश तथा सुवोध यादवलाई पठाएर आफू एक दिनपछि जाने निर्णय गरेका थिए। बिहान उठ्दा परिवार चढेको गाडी दुर्घटनामा परेको खबरले उनलाई स्तब्ध बनायो।

दुर्घटनामा परी अवधेशकी ३५ वर्षीया श्रीमती पुनमदेवी यादव, उनकी १० वर्षीया छोरी अनुकुमारी, सात वर्षीया दीक्षा र पाँच वर्षीया दीपिकाको ज्यान गएको छ। यस्तै, उनका दुई भाइ २६ वर्षीय विकेश यादव र २४ वर्षीय सुवोध यादवले पनि ज्यान गुमाएका छन्। परिवारका सदस्य विकेश काठमाडौंमा सिभिल इन्जिनियरिङ पढ्दै थिए भने सुवोध फलफूलको व्यापारमा लागेका थिए। अवधेशका १४ महिनाका बालक सुदीप यादव भने घाइते भएका छन्।

जिल्ला प्रहरी कार्यालय मकवानपुरका अनुसार चालकसहित १४ जनाको मृत्यु भएको उक्त दुर्घटनामा ६ जना घाइते भएका छन्। दुर्घटनामा घाइते भएका ३३ वर्षीय मुकेश यादव, पाँच वर्षीय सक्षमकुमार यादव र २६ वर्षीय देवेन्द्र रायलाई उपचारपछि अस्पतालबाट घर पठाइएको छ। यसैबीच, तीन वर्षीय सुजन यादव र १४ महिनाका सुदीप यादवलाई थप उपचारका लागि काठमाडौंको मेडिसिटी अस्पतालमा सारिएको छ भने ३१ वर्षीय देवेन्द्र रायलाई भरतपुरको मनकामना अस्पतालमा पठाइएको छ।

भीमफेदी सडकखण्डमा बारम्बार दुर्घटना

दुर्घटनाको यकिन कारण अझै खुलिसकेको छैन। प्रहरी नायब उपरीक्षक माधवप्रसाद काफ्लेले प्रारम्भिक जानकारी अनुसार उक्त गाडी अघिल्लो साँझ सर्लाहीबाट काठमाडौं आएको र राति यात्रु लिएर पुनः फर्किएको बताए। चालकले पर्याप्त विश्राम नपाएको हुन सक्ने विषयमा अनुसन्धान भइरहेको छ। मकवानपुरका प्रहरी उपरीक्षक श्यामबहादुर खत्रीले दुर्घटनास्थल अत्यन्त ठाडो भिरमा रहेको र उद्धार कार्यमा समेत कठिनाइ भएको बताएका छन्।

मकवानपुरका प्रमुख जिल्ला अधिकारी वसन्त अधिकारीले भीमफेदी–देउराली सडकखण्डमा विगत १३ महिनाको अवधिमा यो तेस्रो ठूलो दुर्घटना भएको जानकारी दिएका छन्। उनले सडक सुरक्षामा तत्काल सुधार आवश्यक रहेको र घुम्तीमा ऐना, ट्राफिक सङ्केतलगायत सुरक्षा संरचनाको अभाव रहेको औँल्याएका छन्। दुर्घटनाको कारण पत्ता लगाउन जिल्ला प्रशासन कार्यालय मकवानपुरले सहायक प्रमुख जिल्ला अधिकारी शेषकान्त पौडेलको संयोजकत्वमा पाँच सदस्यीय छानबिन समिति गठन गरेको छ। समितिलाई एक साताभित्र प्रतिवेदन पेस गर्ने कार्यादेश दिइएको छ।

नेपालमा सडक दुर्घटनाको प्रमुख कारण सवारी चालकको लापरवाही रहेको ट्राफिक प्रहरीको तथ्यांकले देखाउँछ। आर्थिक वर्ष २०८०/०८१ मा देशभर सडक दुर्घटनामा परी २ हजार ३ सय ६९ जनाको मृत्यु भएको थियो भने ३२ हजार १ सय ५६ जना घाइते भएका थिए। दैनिक औसतमा ६२ दुर्घटना हुने र ७ जनाको ज्यान जाने गरेको तथ्यांकले सडक सुरक्षामा गम्भीर प्रश्न उब्जाएको छ। छठ पर्व मनाउन घर फर्किने क्रममा भएको यो हृदयविदारक घटनाले मधेस प्रदेशका सुन्दरपुर गाउँलाई शोकमा डुबाएको छ।

यसअघि: भीमफेदी दुर्घटनामा १४ जनाको मृत्यु, एकै परिवारका ६ जनासहित सर्लाहीका सुन्दरपुर गाउँ शोकमा