बागलुङबाट वीरगन्ज कालोबजारीका लागि युरिया मल पठाउने तीन व्यापारी पक्राउ परेका छन्। जिल्ला प्रहरी कार्यालय, बागलुङले किसानलाई वितरण गर्नुपर्ने अनुदानको मल अन्यत्र पठाएको अभियोगमा उनीहरूलाई नियन्त्रणमा लिएको हो।
प्रहरीले बागलुङ बजारका दुई कृषि सामग्री पसलबाट खरिद गरिएको युरिया रात्रिबस मार्फत वीरगन्ज पठाएको पुष्टि गरेपछि पक्राउ गरेको हो। किसानका लागि तोकिएको कोटा अनुसार जिल्लामा बिक्री गर्नुपर्ने मल अन्यत्र पठाएको अभियोगमा उनीहरूमाथि अनुसन्धान भइरहेको छ।
पक्राउ पर्नेमा पर्साको छिपहरमाई गाउँपालिका–६ का दिनेश पण्डितकुमार तथा बागलुङ नगरपालिका–२ का कुलबहादुर रानामगर र विनय शाक्य छन्। उनीहरूमाथि कालोबजारी ऐन तथा केही अन्य सामाजिक अपराध तथा सजाय ऐनअन्तर्गत मुद्दा चलाइने प्रहरीले जनाएको छ।
