राष्ट्रिय प्रजातन्त्र पार्टी (राप्रपा) ले बागमती प्रदेशका मुख्यमन्त्रीले भदौ ८ गते प्रदेशसभामा लिने विश्वासको मतको विपक्षमा मतदान गर्न आफ्ना प्रदेशसभा सदस्यलाई ह्वीप जारी गरेको छ। राप्रपाले मुख्यमन्त्रीको विश्वासको मतसम्बन्धी प्रस्तावमा विपक्षमा मतदान गर्न, तटस्थ रहन वा बैठकमा अनुपस्थित हुन आफ्ना सांसदलाई निर्देशन दिएको हो।
बागमती प्रदेशसभामा राप्रपाकी प्रमुख सचेतक कुमारी तामाङले ह्वीप जारी गरेकी हुन्। तामाङले जारी गरेको ह्वीप आइतबार दिउँसो नै प्रदेशसभाका सबै राप्रपा सदस्यलाई पठाइएको छ।
मुख्यमन्त्रीले विश्वासको मत लिनुपर्ने समय नजिकिँदै गर्दा राप्रपाको यो निर्णयले बागमती प्रदेशसभामा सरकारको पक्षमा आवश्यक बहुमत जुटाउने प्रयासलाई थप चुनौतीपूर्ण बनाएको छ। राप्रपाका प्रदेशसभा सदस्यहरूले पार्टीको निर्देशनअनुसार मतदान गरेमा मुख्यमन्त्रीको विश्वासको मतसम्बन्धी प्रस्तावमा उनीहरूको समर्थन रहने छैन।
यसैबीच, नेपाली कम्युनिस्ट पार्टी (नेकपा) ले आफ्ना सांसदलाई बागमती प्रदेशका नवनियुक्त मुख्यमन्त्री किरण थापा मगरलाई विश्वासको पक्षमा मतदान गर्न निर्देशन दिएको छ। नेकपा बागमती संसदीय दलका प्रमुख सचेतक रत्नप्रसाद ढकालले जारी गरेको विज्ञप्तिमा मुख्यमन्त्री थापा मगरले विश्वासको मतसम्बन्धी प्रस्ताव पेस गर्ने भएकाले भदौ ८ गते सोमबार दिउँसो १ बजे बस्ने प्रदेशसभा बैठकमा अनिवार्य उपस्थित हुन सांसदलाई निर्देशन दिइएको छ।
सत्ता साझेदार दल नेकपाको प्रदेशसभामा २६ जना सांसद छन्। सरकारमा मन्त्री पठाउने विषयमा नेकपाभित्र विवाद बढेको छ। असन्तुष्ट सांसदहरू बैठकमा सहभागी नभएको बताइएको छ।
नेकपा एमालेका थापा एमाले, नेकपा र राष्ट्रिय प्रजातन्त्र पार्टी (राप्रपा)को समर्थनमा ४ भदौमा मुख्यमन्त्री बनेका हुन्। राप्रपाले पार्टी केन्द्रको निर्देशनविपरित समर्थन गरेको भन्दै संसदीय दलका नेता उद्धव थापालाई कारबाही गरेको छ। सरकारमा सहभागी राप्रपाका ३ मन्त्रीलाई स्पष्टीकरण सोधिएको छ।
