बाजुराको गौमुल गाउँपालिका–३ कटीगाउँमा पहिरोले दुई घर पूर्ण क्षति पुर्याएपछि १४ घरका ११५ जनालाई सुरक्षित स्थानमा सारिएको छ। बिहीबार दिउँसो अविरल वर्षासँगै आएको पहिरोले ५७ वर्षीय पूर्णिमल बोहरा र ३८ वर्षीया बुदी बोहराको तीनतले घर पुरेको छ।
जिल्ला प्रहरी कार्यालयका प्रवक्ता नरेशबहादुर शाहीका अनुसार दुवै घरभित्रका सामानसमेत पुरिएका छन्। आसपासका क्षेत्रमा पहिरोको जोखिम कायम रहेकाले १४ घरका ११५ जनालाई अस्थायी टहरामा स्थानान्तरण गरिएको छ। पुरिएका सामग्री निकाल्ने प्रयास जारी छ।
गाउँपालिका अध्यक्ष हरिबहादुर रोकायाले विस्थापित परिवारलाई राहत सामग्री हस्तान्तरण गर्न पालिकाबाट टोली परिचालन भएको जानकारी दिए। उनले स्थानीय सामाजिक सङ्घसंस्थाहरूलाई सहयोगमा जुट्न आह्वान गरेका छन्।
