संसदीय राज्य व्यवस्था तथा सुशासन समितिका सदस्यहरूले बनेपामा रहेको सुकुम्वासी होल्डिङ सेन्टरको निरीक्षण गर्दै त्यहाँका नागरिकका समस्या र मागबारे जानकारी लिएका छन्।
समिति सभापति हरि ढकालको नेतृत्वमा कर्मचारी र सदस्य गरी १५ जनाको टोली सोमबार बिहान होल्डिङ सेन्टर पुगेको थियो। यो टोलीले काठमाडौंका सुकुम्वासीलाई राखिएको होल्डिङ सेन्टरको अवस्थाबारे बुझेको हो।
टोलीले त्यहाँ बस्दै आएका सुकुम्वासी बस्तीका नागरिकहरूसँग छलफल गरी तत्काल समाधान गर्नुपर्ने मागहरू टिपोट गरेको छ। टोली त्यहाँ पुग्दा केही सुकुम्वासीले रोएर आफ्ना पीडा पोखेका थिए।
सुकुम्वासीहरूले बालबच्चाको पढाई, दीर्घरोगीहरूलाई उचित व्यवस्थापन र छिटो स्थायी बसोबासको माग प्रमुख रूपमा राखेका छन्।
समितिका सभापति ढकालले शिक्षा र स्वास्थ्यको उचित व्यवस्था छिट्टै हुने आश्वासन दिएका छन्। सरकारले उनीहरूको समस्या समाधान छिटो गर्ने वाचा गरेको पनि बताइएको छ।
यो निरीक्षणले सुकुम्वासीका समस्यालाई संसदीयस्तरमा उठान गर्दै समाधानका लागि दबाब सिर्जना गरेको छ।
