बारामा जितिया पर्वमा नुहाउने क्रममा दुई किशोरीको पोखरीमा डुबेर मृत्यु भएको छ।
शनिबार साँझ देवताल गाउँपालिका-६, बेनौलीस्थित पोखरीमा नुहाउँदै गर्दा उनीहरू डुबेका हुन्। मृत्यु हुनेमा १४ वर्षीया निशा पटेल र १४ वर्षकै चाँदनी पटेल रहेका छन्। उनीहरू देवताल गाउँपालिका-६, रौवाहीका बासिन्दा हुन्।
जिल्ला प्रहरी कार्यालय, बाराका सूचना अधिकारी प्रहरी नायब उपरीक्षक मिनबहादुर घलेले दिएको जानकारीअनुसार पोखरी अत्यधिक गहिरो र पानी धेरै भएकाले पौडी खेल्न नजान्ने दुवै किशोरीको मृत्यु भएको हो। मृतक दुवैको शव पोस्टमार्टमका लागि प्रादेशिक अस्पताल कलैयामा राखिएको छ।
जितिया पर्वमा आमाहरूले आफ्ना सन्तानको दीर्घायुको कामना गर्दै कठोर व्रत बस्ने गर्छन्। पर्वको पहिलो दिन ‘नहाय-खाय’ अन्तर्गत सूर्यास्त हुनुअघि नदी, तलाउ वा अन्य जलाशयमा नुहाउने चलन छ।
मृतक किशोरीहरूको उमेरबारे भने फरक-फरक जानकारी प्राप्त भएको छ। प्रहरीले दुवैको उमेर १४ वर्ष उल्लेख गरे पनि साझेदारी दैनिकले चाँदनी पटेलको उमेर १५ र निशा पटेलको उमेर १६ वर्ष रहेको जनाएको छ। घटनाबारे थप अनुसन्धान भइरहेको प्रहरीले बताएको छ।
